Փորձել է բադի ձագին տանող կատվի վրա կրակել. ինչու է «ՀԷՑ»-ի աշխատակիցը կրակել 17-ամյա աղջկա վրա

Շիրակի մարզում հուլիսի 2-ին «ՀԷՑ»-ի աշխատակցի կողմից 12-րդ դասարանի աշակերտուհու վրա կրակելու դեպքի առթիվ քրեական գործի հարուցումը մերժվել է՝ հանցակազմի բացակայության հիմքով: Այս մասին NEWS.am-ի գրավոր հարցմանն ի պատասխան հայտնեցին Քննչական կոմիտեի դեպարտամենտի տեղեկատվության եւ հասարակայնության հետ կապերի բաժնից:

Նրանց փոխանցմամբ՝ հուլիսի 2-ին՝ ժամը 16:30-ին, Աշոցքի «Տիրամայր Նարեկ» հիվանդանոցից ահազանգ է ստացվել, որ աջ ազդրի վերին 1/3-ի, ստորին 1/3-ի, սրունքթաթային հոդի ներսային մակերեսի եւ ձախ ազդրի 1/3-ի ներսային մակերեսի հրազենային (կոտորակային) վերքեր ախտորոշմամբ բուժօգնության է տեղափոխվել Աշոցք գյուղի 17-ամյա բնակչուհի։

Նյութերի նախապատրաստման փուլում պարզվել է անչափահասի՝ նշված մարմնական վնասվածքներն ստանալու հանգամանքները։

Պարզվել է, որ աղջիկն իր ընկերուհու հետ դեպքի օրը գնացել էր գյուղի դպրոցի նախկին շենքի հետնամաս՝ զբոսնելու եւ ծաղիկ հավաքելու։ Նույն ժամանակ հիշյալ շենքի հարեւանությամբ բնակվող Ա.Սարիբեկյանն իր տան բակում զբաղված է եղել առօրյա գործերով։ ժամը 16:00-ի սահմաններում նկատել է  տան բակից բադի ձագին տանող մի կատվի եւ անմիջապես մտել է տուն, վերցրել իրեն պատկանող «ՏՕԶ» մոդելի 16 մմ  տրամաչափի որսորդական ողորկափող հրացանը եւ իր բակի ցանկապատի մոտից կրակել դեպի դպրոցի նախկին շենքի կողմը փախչող կատվի ուղղությամբ, սակայն փամփուշտի կոտորակները կատվին չեն դիպել եւ մարմնական վնասվածք են պատճառել ծառի հակառակ կողմում կանգնած աղջկան, որի ճիչը լսելուց հետո է միայն Ա.Սարիբեկյանը նկատել նրան:

Տեսնելով, որ աղջիկը կրակոցի հետեւանքով ոտքերի շրջանում մարմնական վնասվածքներ է ստացել, Ա.Սարիբեկյանը նրան առաջին բուժօգնություն է ցույց տվել եւ հարեւանին խնդրել զանգահարել շտապօգնություն:

Նյութերի նախապատրաստման ընթացքում Ա.Սարիբեկյանն ընդունել է իրեն պատկանող որսորդական հրացանով կրակելու եւ համագյուղացի աղջկա առողջությանն անզգուշությամբ թեթեւ վնաս պատճառելու փաստը: Տուժածը բողոք չի ներկայացրել Ա.Սարիբեկյանի դեմ:

Նյութերի նախապատրաստման ընթացքում պարզվել է նաեւ, որ Ա.Սարիբեկյանը 18.02.2014 թվականից հանդիսանում է «Հայաստանի որսորդների եւ ձկնորսների միավորում» հասարակական կազմակերպության անդամ, ունի որսորդական, սպորտային  ողորկ-երկարափող հրազեն կամ որսորդական օդաճնշիչ զենք պահելու եւ կրելու թույլտվություն:

Նկատի ունենալով, որ ՀՀ քրեական օրենսգիրքը քրեական պատասխանատվություն չի նախատեսում՝ անզգուշությամբ մեկ ուրիշի առողջությանը թեթեւ վնաս պատճառելու համար, պատասխանատվություն նախատեսվում է միայն անզգուշությամբ անձի առողջությանը միջին եւ ծանր վնաս պատճառելու համար, նախապատրաստված նյութերով քրեական գործի հարուցումը մերժվել է, Ա.Սարիբեկյանի  նկատմամբ  քրեական  հետապնդում չի իրականացվել` նրա  արարքում հանցակազմի բացակայության հիմքով: