Լրագրող Անի Գեւորգյանի գործով ծառայողական քննությունն ավարտվել է. խախտումներ չեն հայտնաբերվել

«Չորրորդ իշխանություն» թերթի լրագրող Անի Գեւորգյանի հետ կապված միջադեպով ոստիկանությունում ընթացող  ծառայողական քննությունը 1.5 տարի անց ավարտվել է: Լրագրողի նկատմամբ բռնություն կիրառելու, նրա մասնագիտական գործունեությունը խոչընդոտելու դեպք չի հաստատվել, ոստիկանների կողմից կարգապահական բնույթի խախտումներ թույլ տալու հանգամանքները չեն հիմնավորվել: Այս մասին այսօր`հուլիսի 21-ին, NEWS.am-ի հետ զրույցում ասաց Անի Գեւորգյանը`նշելով, որ սպասելի էր գործի նման հանգուցալուծումը:

«Ես կարծում եմ, որ միայն միամիտը կարող է մտածել, որ ոստիկանությունը կարող է ինքն իր գործողությունները քննել եւ արդյունքում ինքն իրեն պատժել»,-ասաց նա:

Անի Գեւորգյանը նշեց, որ իրենք այս միջադեպով ՀՔԾ-ում հարուցված քրեական գործի հիման վրա հայց են ներկայացրել Մարդու իրավունքների եվրոպական դատարան:

Հիշեցնենք, որ նախորդ տարի փետրվարի 12-ին` ժամը 18:00-ի սահմաններում, ՀԱԿ ակտիվիստները Սարյան փողոցում մարտի 1-ին կայանալիք հանրահավաքի իրազեկման թռուցիկներ բաժանելիս վեճի էին բռնվել մի խումբ երիտասարդների հետ, որից հետո բերման էին ենթարկվել ոստիկանության Կենտրոնականի բաժին: Պարզվել է, որ այդ տղաները ՀՀԿ երիտասարդական կազմակերպության անդամներ են: Նրանց թվում են Հայկ Ղեւոնդյանը՝ Հայաստանի ագրարային համալսարանի ուսխորհրդի նախագահը, Դանիել Հայրապետյան՝ ուսխորհրդի անդամ, Գեւորգ Սողոմոնյանը՝ ՀՀԿ երիտասարդական խորհրդի անդամ:

Համացանցում հայտնվել էր նաեւ տեսանյութ, որտեղ լրագրող Անի Գեւորգյանի նկատմամբ բռնություն է գործադրվում: Լրագրողի խոսքով, ոստիկանները բաժնում խլել էին իր տեսախցիկը, իսկ բաժնի պետը հարվածել էր իրեն: Դեպքի առթիվ ՀՔԾ-ում  ՀՀ ՔՕ 164-րդ եւ 309-րդ հոդվածների 2-րդ մասերի հատկանիշներով հարուցվել է քրեական գործ: