Ականատեսը պատմում է` ինչպես է ժայռից ընկել ու մահացել 11–ամյա աղջիկը (լուսանկար, տեսանյութ)

Լոռու մարզում ժայռից ընկած ու մահացած 11-ամյա աղջիկը ընկերների հետ ժայռի վրա էր բարձրացել՝ մատուռում մոմ վառելու համար: Այս մասին NEWS.am-ին պատմեց տեղի բնակիչներից Կարինե Քալաշյանը, որը դեպքի ժամանակ մոտակայքում է եղել:

«Իրիկունը 7-ին մոտ էր, գառներին էի փնտրում, երեխաներին տեսա, հարցրի՝ ուր եք գնում, ասին՝ գնում ենք քարի գլուխը, մատուռում մոմ վառեն ու գան: Մինչև գտա գառներին, 8 անց եղավ: Ժայռի վրա մասուրի թփի մոտ երեխաները խմբված էին, մեկ էլ մեկը ճվաց. դեռ հեռվից տեսա, թե երեխեն ոնց ընկավ: Վազելով, չոքեչոք հասել եմ երեխուն»,- պատմեց Կարինե Քալաշյանը:

Գարգառի բնակչուհին պատմեց, որ աղջկա ընկնելուց հետո երեխաներից մեկը ժայռի արանքով իջել է, որ օգնի, մյուսներն էլ կախվել են ժայռից ու օգնություն կանչել:

Տիկին Քալաշյանն անմիջապես զանգահարել է «Շտապօգնություն», սակայն երեխան արդեն մահացած է եղել. ««Շտապօգնությունն» անմիջապես, շատ արագ եկավ: Եկավ, բայց ի՞նչ: Գյուղացիները՝ որը դույլով, որը շշերով ջուր էին բերում: Ջուր էլ հասցրին, ամեն ինչ էլ, բայց ոչ մի բան չէինք կարող անել»:

Կարինե Քալաշյանը պատմեց, որ երեխաներն առանց տանը զգուշացնելու էին ժայռը բարձացել:

Ավելի վաղ հայտնել էինք, որ հուլիսի 20-ի երեկոյան Լոռու մարզի Գարգառ գյուղում 11-ամյա աղջիկը  ընկել է ժայռից ու մահացել: Աղջիկը Գյուլագարակ գյուղի բնակիչ էր, դեպքի օրը գնացել էր տատիկի տուն: Նա տան ավագն էր, ուներ փոքր քույր: Աղջկա մայրը չի աշխատում, հայրը մեկնում է արտագնա աշխատանքի: