Համացանցի աստղ դարձած զույգը . բացառիկ հարցազրույց

Armenia24.info-ը գրում է . 

Օրերս համացանցում մեծ աղմուկ բարձրացրեց մի տեսանյութ։ Տեսանյութի հերոսները երկուսն էին՝ ԵՊԲՀ-ի շրջանավարտներ Տիգրանը և Լիլիթը։ Դիպլոմների հանձման հանդիսավոր արարողության ժամանակ Տիգրանը գնաց անկանխատեսելի քայլի. Երկրի բարձրաստիճան պաշտոնյաների և բազմաթիվ հանդիսականների ներկայությամբ ամուսնության առաջարկ արեց իր սիրելիին՝ Լիլիթին։ Նրանք միասին են սովորել` առաջին կուրսից սկսած։ Այդ պատասխանատու քայլին գնալու համար միմյանց, կարելի է ասել, բավականին լավ են ճանաչում։ Հարկ է նշել, որ Տիգրանը բուհն ավարտել է կարմիր դիպլոմով, որին իսկապես արժանի էր։ Ով-ով, բայց տողերիս հեղինակը լավ գիտի այդ մասին։ Շատերին կհետաքրքրի, թե ինչից և ինչպես սկսվեց սիրո այս պատմությունը: Armenia24.info-ն ընթերցողին է ներկայացնում բացառիկ ու անկեղծ հարցազրույց զույգի հետ։

-Բարի երեկո, ապրես, Տիգրան ջան, հիացրիր, շնորհավորում եմ։
Տիգրան -Մերսի շատ, ընկեր Թոքմաջյան:
Լիլիթ –Տիկ, իրար հերթ տալու՞ ենք (ժպտում է)։

-Ինչպե՞ս սկսվեց ամեն ինչ։ Նկատի ունեմ ձեր սիրո պատմությունը։

Տիգրան -Լիլ, ասա', թեյի ու աչքերիս պատմությունը (ժպտում է)։
-Սպասում եմ, արդեն հետաքրքիր է:
Տիգրան-Բայց էդ մի քիչ հանրային չի (ժպտում է)։ Երևի սկիզբ, որպես այդպիսին, չի էղել: Ամեն ինչ ժամանակի ընթացքում աստիճանաբար հասունացավ:

-Լիլիթ, դու ի՞նչ կասես:

Լիլիթ-Ես համակարծիք եմ։
Տիգրան -Արդեն հնազանդ ա:

-Տիգրան, ի՞նչը քեզ գրավեց Լիլիթի մեջ, կա՞ն որոշակի հատկանիշներ, որոնք կցանկանաս նշել։ Առաջին կուրսում, եթե չեմ սխալվում, ուսումնասիրում էիր։

Լիլիթ -Ես անհամբեր սպասում եմ պատասխանին։
Տիգրան-Իհարկե...անկեղծությունը, ազնվությունը, երբևէ սուտ չխոսելը (ինչ իրավիճակներում էլ որ լինենք)... սրանք էն գեղեցկագույն հատկանիշներն են, որոնք հազվադեպ են համադրվում:
Լիլիթ-Դու՞ք էլ եք նկատել։ Առաջարկում եմ` դուք էլ կարծիք արտահայտեք այս թեմայի շուրջ` որպես դասախոս ։
-Այո, նկատել եմ։

-Տիգրան, իսկ ե՞րբ զգացիր, որ խորքային զգացմունքներ ունես Լիլիթի նկատմամբ։

Տիգրան-Երևի դա էլ ժամանակի ընթացքում ստացվեց.... առանձին օր չի էղել, որ հասկանամ` հո'պ, սիրահարվել եմ. շատ սահուն պրոցես էր էլի` առանց վայրիվերումների:

-Ե՞վ, ի՞նչ դժվարությունների հանդիպեցիր մինչ Լիլիթի համաձայնությունը ստանալը։

Տիգրան-Մազերս սպիտակեցին ։ Իրականում, բավականին երկար ժամանակ մերժվել եմ։ Բայց ժամանակն ամեն ինչ իր տեղը գցեց։

-Լիլիթ, շա՞տ ես մտածել, ուսումնասիրել, ինքդ քեզ հետ քննարկել, մինչև սկսել ես հանդիպել Տիգրանի հետ։

Լիլիթ-Լուրջ, պատասխանատու ու ճակատագրական որոշում էր։ Տարիներ պահանջվեցին...

-Որքա՞ն ժամանակ է, ինչ միասին եք։

Լիլիթ- հաճախ տրվող այդ հարցին սովորաբար կատակով պատասխանում ենք` պուճուր ժամանակվանից։
Տիգրան-Էլի հստակ սկիզբ չի էղել... եկավ մի պահ, երևի երրորդ կուրսում էր, հասկացանք, որ առանց իրար շատ տխուր ա, գրեթե անհնար... էդպես էլ սկսվեց:

-Լիլիթ, նշի'ր, խնդրում եմ, Տիգրանի բնավորության երեք լավագույն գծերը։

Լիլիթ- Ծայրահեղ նպատակասլաց, խելացի, աշխատասեր ու համառ, ինչպես նաև հոգատար, պատասխանատու, հավատարիմ, կենսուրախ, բարի, անկեղծ ու անկաշառ։ Սա մեկ:
-էլ կա՞։
Լիլիթ-Շատ-շատ։
-Լավ։
Լիլիթ- Շարունակե՞մ։
-Իհարկե, խնդրեմ։
Տիգրան-Լի՞լ, դու սիրահարվա՞ծ ես: ։
Լիլիթ- Ավելացնեմ նաև ընկերասեր լինելու փաստը...ընդհանրապես, իր ներսում լիքը սեր կա ու ներողամտություն:

-Տիգրան, ի՞նչը կփոխեիր Լիլիթի մեջ (եթե իհարկե, նման բան կա)։

Լիլիթ- Օհօ, երկար ենք սպասելու, ընկեր Թոքմաջյան։
-Դե, մի փոքր սադրանքը չի խանգարի:
Տիգրան-Կուզեի` վերջ տար ուշացումներին , ավելի ինքնավստահ լիներ, հավատար իր ուժերին:

-Ի՞նչ հիշարժան դեպք կպատմեք, որը կհետաքրքրի ընթերցողին։

Լիլիթ- Օրերից մի օր` մեր երդման հանդիսավոր արարողության ժամանակ...մնացածը ընթերցողը գիտի:
Տիգրան-Հետաքրքիր դեպքեր շատ կան, բայց չգիտեմ, մեզանից բացի, ուրիշներին դա կհետաքրքրի՞, թե՞ ոչ։ Կար մի պահ, որ մտածում էի ֆակուլտետը փոխելու, ռազմական գնալու մասին։ Արդյունքում, էլ միասին չէինք սովորի, նույն խմբում չէինք լինի։ Ու երբ ամեն ինչ պատրաստ էր, դիմումս` գրված, որքան հիշում եմ, դիմումը ետ վերցնելու միակ պատճառը հենց Լիլիթն էր։

- Ե՞րբ առաջացավ դիպլոմների հանձնման արարողության ժամանակ նման առաջարկություն անելու գաղափարը:

Տիգրան- Մի քանի օր առաջ էի մտածել դրա մասին, բայց նախնական սցենարով դա պետք ա լիներ համալսարանի տարածքում, բայց ոչ հենց հանդիսավոր արարողության ժամանակ:

-Ի՞նչ հանգամանքներ նպաստեցին որոշումը փոխելուն։

Տիգրան- Նման ձևով առաջարկություն անելու գաղափարը առաջացավ հանպատրաստից, արարողությունը սկսվելուց րոպեներ առաջ։ Չգիտեմ։
-Սպոնտա՞ն։
Տիգրան-Բացարձակապես սպոնտան, ինչ-որ գժական ակնթարթում։

-Որևէ մեկը գիտե՞ր այդ մասին։

Տիգրան -Գիտեին ընկերներիցս մի քանիսը, ովքեր էլ օգնեցին, որ ամեն ինչ սահուն անցնի։

-Լիլիթը բացարձակապես անտեղյա՞կ էր։

Տիգրան-Լրիվ անտեղյակ։ Կարծում եմ, տեսանյութից դա պարզ երևում ա:

-Լիլիթ, կնկարագրե՞ս զգացողություններդ, երբ բարձրախոսով լսեցիր Տիգրանի ձայնը և առաջարկը։

Լիլիթ- Ռետրոսպեկտիվ հայացք նետելով ու մի փոքր ավելի սառը դատելով` նոր եմ հասկանում, որ մոտ ընկերներս բավականին անսովոր պահվածք ունեին...կարող էի և գլխի ընկնել։ Երբ բարձրախոսով իր ձայնը լսեցի, ինձ թվաց, թե լրիվ այլ բան է ասելու` կապված կարմիր դիպլոմի արժանացած մեր մյուս ընկերոջ հետ: Բայց, երբ անունս լսեցի, արդեն ամեն ինչ պարզ էր. չեմ հասկացել, թե ինչպես եմ քայլել դեպի նա…անգամ չէի նկատել, որ ծնկի է իջել...ոտքերս դողում էին, ավելին նկարագրել չեմ կարող…դեռ լրիվ ուշքի չեմ եկել:

-Տիգրան, բարձրաստիճան պաշտոնյաների ներկայությունը չկաշկանդե՞ց։

Տիգրան-Կաշկանդեց, իրականում, ես էլ շատ հուզված էի, բայց մյուս կողմից էլ ոգևորեց այն հանգամանքը, որ ներկա էին թե' բարձրաստիճան պաշտոնյաները, թե' բազմաթիվ անվանի բժիշկները, թե' մեր հարազատ ընկերներն ու ԵՊԲՀ-ի մեծ մասը, որոնցից այդ պահին մեծ աջակցություն էի սպասում, ու հուսախաբ չարեցին։

-Հարսանիքի հետ կապված պլաններ արդեն կա՞ն։

Տիգրան-Դեռ ոչ, փորձենք ուշքի գալ, հասկանանք, թե ինչ ենք արել ու ավանդական եղանակով կառուցենք մեր փոքրիկ ընտանիքը։

-Իսկ նոր անակնկալների սպասե՞նք:

Լիլիթ-Ես էլ իմանամ, որ գոնե մի փոքր պատրաստված լինեմ:
Տիգրան-Կարծում եմ, մենք արդեն ունեցանք մեր հիշարժան օրը, որը ողջ կյանքում չենք մոռանա։
-Շնորհակալություն անկեղծ զրույցի համար

Հ. Գ.
Վերջում, Տիգրանը ցանկացավ իր խորին շնորհակալությունը հայտնել բուհի ղեկավարությանը՝ երդման արարողությունը բարձր մակարդակով կազմակերպելու համար։

Հրապարակման պատրաստեց armenia24.info-ն։