Երևանի կենտրոնում սկեսրայրը գետնին է տապալել ու ոտքերով հարվածել երկամյա թոռին գրկած նախկին հարսին

Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ ավարտվել է Արդուշ Ա.-ի դատական գործի քննությունը: 64-ամյա Արդուշ Ա.-ին մեղադրանք էր առաջադրված նախկին հարսին ծեծելու համար՝ ՀՀ քրեական օրենսգրքի 118 հոդվածով: Ոչ ծանր մեղադրանքով այս գործի դատական քննությունը սկսվել էր 2015 թվականի դեկտեմբերի 30-ից:

Ըստ մեղադրանքի՝ Արդուշ Ա.-ն 2015 թվականի հունիսի12-ին, ժամը 18-ն անց 45-ի սահմաններում «Երիտասարդական» մետրոյի հարակից այգում ծեծի է ենթարկել 2 տարեկան երեխային գրկած նախկին հարսին ու պատճառել է թեթև վնասի հատկանիշներ չպարունակող վնասվածքներ: Ամբաստանյալ Արդուշ Ա.-ն իրեն մեղավոր չի ճանաչել: Նա հայտնել է, թե դեպքի օրն ընկերոջ հետ ժամադրված էր մետրոյի մոտի այգում: Մինչև ընկերոջ գալը այգում անսպասելի տեսել է թոռնիկին: Երկու տարեկան երեխան մենակ կանգնած՝ «մամա» էր կանչում:

Ինքը նայել է շուրջը ու տեսել է, որ նախկին հարսը՝ թիկունքով դեպի երեխան, զրուցում է ընկերուհու հետ: Ինքը բարձր գոռացել է հարսի անունը, վերջինս վազելով մոտեցել է երեխային: Ինքն էլ քայլելով է մոտեցել թոռնիկին: Հարսն ու նրա ընկերուհին, իրեն մոտենալով, սկսել են պայուսակներով հարվածել իրեն: Ինքը փորձել է «ամբողջ մարմնով պաշտպանել, որպեսզի հարվածները երեխային չդիպչեն»: Հարսի ընկերուհին շարունակել է իրեն հարվածել, իսկ հարսը երեխային գրկած՝ հետ-հետ է գնացել ու ընկել է գետնին: Երբ ընկել է, նրա հետևի մասում պատ է եղել, ընկնելու ժամանակ հարսը դիպել է այդ պատին, երևի այդ ժամանակ է վնասվել: Նրա օգնության կանչերի վրա երեք տղամարդիկ են մոտեցել, մեկը իրեն հրելով տարել է շատ հեռու: Ամբաստանյալը պնդել է, թե ինքը չէր կարող հարվածներ հասցնել նախկին հարսին, որովհետև թոռնիկը հարսի գրկին էր: Եթե ինքը ոտքով հարվածեր հարսին, հարվածը թոռնիկին կդիպչեր, բացի այդ՝ հարսի վնասվածքն էլ թեթև չէր լինի, այլ հնարավոր է՝ ոտքը կոտրվեր: Ինքը հարսի համար եղել է հոգատար սկեսրայր…

Տուժող Ասյա Ս.-ն (անունը փոխված է) հայտնել է, որ դեպքի օրը իր երկու տարեկան երեխայի ու ընկերուհու հետ դուրս էր եկել զբոսանքի: Մինչև այգի մտնելը երեխան իր գրկին էր, այգում 11.07.2017 Երևանի կենտրոնում սկեսրայրը գետնին է տապալել ու ոտքերով հարվածել երկամյա թոռին գրկած նախկին հարսին – AYB News http://aybnews.su/?p=7693 2/2 երեխային իջեցրել է, մի քանի քայլ են արել, ինքը շրջվել ու տեսել է նախկին սկեսրայրին, ով արագ- արագ մոտենում էր երեխային: Նա որևէ բան չի ասել, չի խնդրել երեխային գրկել: Ինքը ավելի վաղ երեխայի հետ շփվելու տարբերակներ առաջարկել էր, բայց ամուսնու ընտանիքը չէր համաձայնել: Սկեսրայրին տեսնելով՝ ինքը երեխային գրկել է՝ վախենալով, որ նա կվերցնի երեխային ու կտանի: Սկեսրայրը մոտեցել, ամբողջ ուժով երեխային քաշել է իր գրկից, իրեն հրել ու գցել է գետնին: Հետո նա ոտքով մի քանի անգամ հարվածել է իրեն: Ինքն օգնություն է կանչել: Ընկերուհին էլ է օգնություն կանչել: Մի քանի տղամարդիկ են մոտեցել, բռնել են սկեսրայրին, ասել են՝ ի՞նչ ես անում: Նա պատասխանել է, թե ցանկանում էր երեխային համբուրել… Սկեսրայրին հեռացրել են իրենից: Ընկերուհին օգնել, իրեն բարձրացրել է գետնից: Ինքը նստել է մոտակա բացօթյա սրճարանում, մի քանի կին են մոտեցել, փորձել են օգնել, բայց երեխան շատ անհանգիստ է եղել: Իր տունը այգու մոտ է, ինքը երեխայի հետ գնացել է տուն: Դեպքի մասին պատմել է իր ընտանիքի անդամներին: Հայրը զանգահարել է ոստիկանություն: Այդ օրն իրեն զանգել է սկեսուրը, ասել է, թե իրեն հետևում են… Նախկինում եղել են դեպքեր, երբ նախկին ամուսնու ընտանիքը փորձել է երեխային տանել: Այդ օրն էլ, ըստ տուժողի, սկեսրայրը պլանավորված եկել է երեխայի հետևից…

Տուժողը դատարանում պահանջել է, որ ամբաստանյալը ենթարկվի պատժի: Դատաբժշկական փորձագետի եզրակացությամբ՝ տուժողի վնասվածքները հետևանք են բութ առարկաների ներգործության, այդ թվում՝ հարվածի: Լրացուցիչ դատաբժշկական փորձաքննության եզրակացությամբ՝ տուժողի ստացած վնասվածքների տեղակայությունը հիմք է տալիս բացառելու համակցության մեջ վնասվածքների առաջացման հնարավորությունը «սայթաքելու հետևանքով ընկնելու արդյունքում կամ մանկահասակ երեխայի կոշիկի կոշտ շփումներից… Վնասվածքները կարող էին առաջանալ կոշիկ կրող ոտքով որոշակի ուժգնությամբ հարվածներ հասցնելու հետևանքով…»: Դատարանը Արդուշ Ա.-ին մեղավոր է ճանաչել նախկին հարսին ծեծելու համար և դատապարտել է 50 հազար դրամ տուգանքի