Ադրբեջանը պատերազմում չի կարող հասնել իր ցանկացած արդյունքին. Վաղարշակ Հարությունյան

Tert.am-ը գրում է.

Պաշտպանության նախկին նախարար Վաղարշակ Հարությունյանը, այսօր հրավիրած մամուլի ասուլիսին անդրադառնալով ՌԴ արտգործնախարար Սերգեյ Լավրովի հայտարարությանը, որ ԼՂ կոնֆլիկտի կարգավորման գործընթացը պետք է ակտիվացնել, ասաց, թե դա նշանակում է, որ ՌԴ-ն ցանկանում է, որ հակամարտությունը կարգավորվի։

«Չկա նախապայման, որ Ղարաբաղի հարցը լուծվի: Հայաստանը և ԼՂՀ-ն միշտ եղել են կոմպրոմիսի կողմնակից: Միշտ հայտարարել ենք, որ վեց շրջան պատրաստ ենք վերադարձնել, ինչի նախադեպը չկա պատմության մեջ»,-ասաց նա:

Նա պարզաբանեց, որ հայկական կողմի համար սկզբնականը ԼՂՀ–ի կարգավիճակն է, դրանից հետո խոսքն արդեն տարածքների և միջազգային հանրության երաշխիքների մասին է: «Չի կարելի տարածքներ տալ, որովհետև եթե մենք տալիս ենք, դա նշանակում է, որ շփման գիծը երկու անգամ ավելանում է»,- ասաց նա:

Նա հավանական չի համարում, որ բանակցությունների միջոցով կարող է խնդիրը լուծվել, քանի որ Ադրբեջանը չի պատրաստվում գնալ զիջումների: Վաղարշակ Հարությունյանն ասաց, որ Հայաստանը և Ղարաբաղը պատերազմ չեն ցանկանում, քանի որ դրված խնդիրը լուծել են, Ադրբեջանն էլ չի գնա այդ քայլին, քանի որ Հայաստանն ու ԼՂՀ–ն պահում են հավասարակշռությունը: «Եթե Ադրբեջանը համոզմունք ունենա, որ կսկսի պատերազմ և կհաղթի, նա կսկսի»,- ասաց նա:

Վաղարշակ Հարությունյանն ասաց, որ չի կարծում, թե գերտերությունները կստիպեն կողմերին գնալ զիջումների, քանի որ մի կողմից շահերը չի համընկնում, Հայաստանը ՀԱՊԿ անդամ է, իսկ ՝մյուս կողմից էլ Ադրբեջանը Թուրքիայի հետ ունի պայմանագիր, իսկ Թուրքիան ՆԱՏՕ-ի անդամ է և դա կբերի հակամարտության՝ ՀԱՊԿ-ՆԱՏՕ, ինչից նրանք ուղղակիորեն խուսափում են:

Անդրադառնալով Ադրբեջանի իշխանությունների հայտարարություններին, նա ասաց.«Ադրբեջանն ինչ որ հայտարարում է՝ շանտաժ է, քանի որ Ադրբեջանը պատերազմում չի կարող հասնել իր ցանկացած արդյունքին»։

Ինչ վերաբերում է այդ հայտարարություններին հայկական կողմի պատասխանին, ապա նա ասաց.«Հայկական կողմը պարտադիր չէ, որ հիմար հայտարարություններին պատասխանի, այդ ուղղություններում մեր բանակը շատ ճիշտ գրագետ գործում է»:

ՀՀ պաշտպանության նախկին նախարարը նաև անդրադարձավ Հայաստանին տրամադրված ռուսական 200 մլն դոլար վարկին, որով Հայաստանը պետք է Ռուսաստանից զենք գնի։ Ըստ նրա՝ Հայաստանը Ռուսաստանից ներքին գներով է գնում այդ զենքը, այսինքն՝ շատ ավելի էժան, քան այն սպառազինությունը, որը Ռուսաստանը վաճառում է Ադրբեջանին։