Դինքի մահափորձի մասին տեղեկացված ժանդարմերիայի հրամանատարը կարեւորություն չի տվել դրան

Հրանտ Դինքի սպանության գործով կալանավորված Տրապիզոնի ժանդարմերիայի հրամանատար Ալի Օզը հայտարարել է, թե Դինքի սպանությունից 6 ամիս առաջ է իմացել կազմակերպվելիք մահափորձի մասին, սակայն դրան կարեւորություն չի տվել։

Թուրքական Cumhuriyet–ի փոխանցմամբ՝ Հրանտ Դինքի սպանության գործով մայր դատին միացրել են նաեւ Դինքի սպանության մեջ մեղադրվող ժանդարմերիայի զինվորականների դեմ մեղադրական եզրակացությունը, որով Դինքի սպանության գործով մեղադրյալների թիվը 86–ի է հասել։

Մեղադրական եզրակացության մեջ հետաքրքիր դրվագ է առանձնացվել, որտեղ Տրապիզոնի ժանդարմերիայի հետախուզության գործակալներ Վեյսել Շահինն ու Օքան Շիմշեքը Դինքի դեմ մահափորձի կազմակերպման մասին տեղեկությունը Մեթին Յըլդզի միջոցով հայտնել են ժանդարմերիայի հրամանատար Ալի Օզին, սակայն վերջինս հրահանգ չի տվել մահափորձի կանխման համար։

Ավելի ուշ, արդեն Դինքի սպանությունից հետո Տրապիզոնի ժանդարմերիայի հետախուզության բաժնի պատասխանատուներից Մեթին Յըլդըզի եւ Գազի Գյունայի կողմից պատրաստվել է զեկույց, որը Ստամբուլ են գնացել 4 անձ, ուսումնասիրել Դինքի տունն ու «Ակոս»–ի խմբագրությունը եւ սպանությունը կազմակերպելու համար Յասին Հայալին ատրճանակ տրամադրել։

Այս զեկույցը ստորագրվել է Ալի Օզի կողմից։ Ժանդարմերիայի հրամանատար Ալի Օզը հարցաքննության ժամանակ պնդել է, թե Դինքի մահափորձի մասին 6 ամիս տեղեկություն ստացել է, սակայն կարեւորություն չի տվել։

«Ես այդ ժամանակ չէի լսել նրա անունը, նրա խմբագրությունը։ Միայն սպանությունից հետո իմացա, որ նա հայտնի մարդ է եղել։ Եթե նրան կարեւորություն տայի, ամեն ինչ կանեի»,–ասել է Ալի Օզը։