Երեխաների վատ քունը բացասաբար է ներգործում ծնողների առողջության եւ հոգեբանության վրա

Երեխայի վատ քունը կարող է բացասաբար անդրադառնալ նրա ծնողների առողջական վիճակի վրա եւ նրանց մոտ նույնիսկ դեպրեսիա առաջացնել: Այս մասին նշված է սոմնոլոգ փորձագետ, բժշկության պրոֆեսոր Վենդի Հոլլի հոդվածում, որը հրապարակվել է Pregnancy & Childbirth-ում:

Հոդվածում ներկայացված է բժշկի իրականացրած փորձը, որի նպատակն է փոքրիկների ծնողների հոգեկան վիճակի վրա նրանց քնի խնդիրների հետազոտությունը: Պարզվել է, որ երեխայի վատ քունն իսկապես դեպրեսիա է առաջացնում ինչպես մայրերի, այնպես էլ հայրերի մոտ:

Հետազոտությանը մասնակցել են փոքր երեխաներ ունեցող 253 ընտանիքներ, որոնց երեխաների մոտ քնի հետ կապված խնդիրներ են դիտվել: Փորձից բացառել են այն ծնողներին, որոնց մոտ երեխայի ծնվելու պահին կլինիկական դեպրեսիա է ախտորոշվել: Մասնակցող ընտանիքներին պատահական սկզբունքով 2 խմբի են բաժանել: Առաջին խմբում ընդգրկված ծնողները բուժանձնակազմի օգնությունն են ստացել, որն օգնել է շտկել երեխաների վատ քնի վիճակը: Երկրորդ խումբը ոչ մի խորհուրդ եւ քնի խնդիրներն ուղղելու լուծումներ չի ստացել` բացի երեխաների անվտանգության բազային տեղեկություններից:

Փորձը սկսելուց հետո 6 եւ 24 շաբաթ անց գիտնականները գնահատել են ծնողների հոգեբանական վիճակը` հաշվի առնելով այնպիսի գործոնները, ինչպիսին են ծնողների հոգնածությունը եւ նրանց վատ քունը: Պարզվել է, որ այն ծնողները, որոնք երեխաների վատ քունը հաղթահարելու վերաբերյալ մասնագետների խորհուրդներ չեն ստացել, դեպրեսիայի ավելի բարձր մակարդակ են ունեցել, քան այն ծնողները, որոնք բուժանձնակազմի աջակցությունն են ստացել: Երեխաների վատ քնի եւ դեպրեսիայի միջեւ կապ է նկատվել ինչպես երեխաների մայրերի, այնպես էլ հայրերի մոտ: Հենց հաջողվել է քնի խնդիրները լուծել, դեպրեսիայի մակարդակը մայրերի մոտ 30, իսկ հայրերի մոտ 20 տոկոսով նվազել է:

Փորձի արդյունքները վկայում են, որ երեխայի քնի հետ կապված խնդիրները անհրաժեշտ է լուծել մասնագետների օգնությամբ` այդպիսով կհաջողվի բարելավել ծնողների վիճակը: