Գեւորգ Սաֆարյանի նկատմամբ բռնի ուժ է կիրառվել. պաշտպանի ահազանգը դատարանն առաջնահերթ չհամարեց

Ժիրայր Սեֆիլյանի եւ մյուսների գործով դատական նիստին այսօր՝ հունիսի 30-ին,  ամբաստանյալ Գեւորգ Սաֆարյանի պաշտպան Տիգրան Եգորյանը հայտարարեց, որ տեղեկություններ ունի, որ իր պաշտպանյալի նկատմամբ դատարանի շենքի խցում բռնի ուժ է կիրառվել:

Երեւանի Շենգավիթ վարչական շրջանի ընդհանուր իրավասության դատարանում ընթացող արտագնա նիստին փաստաբանը պահանջեց իր պաշտպանյալին բերել դատական նիստերի դահլիճ:

«Ինձ տեղեկություններ փոխանցեցին, որ դատական շենքի խցում Գեւորգ Սաֆարյանի նկատմամբ բռնի ուժ է կիրառվել եւ հայհոյանքներ են լսվել: Խնդրում եմ մեկնաբանեք, թե ինչու եք Գեւորգ Սաֆարյանին հեռացրել նիստերի դահլիճից երեք ժամով, բայց արդեն որերորդ ժամն է լրանում, նա նիստերի դահլիճ չի բերվել»,-ասաց նա:

Սակայն, դատարանը պաշտպանի միջնորդությունն առաջնահերթ չհամարեց եւ որոշեց Տիգրան Եգորյանի միջնորդությունն ավելի ուշ քննարկել եւ որոշեց գործում հանրային պաշտպաններ ներգրավելու հարցը քննարկել: Դատարանի որոշմամբ, ամբաստանյալ Գալուստ Գրիգորյանի պաշտպան ներգրավվեց հանրային պաշտպան Արթուր Ալիխանյանը, իսկ Սասունիկ Կիրակոսյանի` Կարեն Հակոբյանը:

Տիգրան Եգորյանը դատարանի այս քայլը որակեց արհամարհանք իր նկատմամբ եւ անտարբերություն, խտրականություն իր պաշտպանյալի եւ նրա առողջության նկատմամբ: 

Իսկ Ժիրայր Սեֆիլյանի շահերի պաշտպան Տիգրան Հայրապետյանն էլ նշեց, որ առարկություններ ունի նախագահող դատավորի նիստի վարման կարգի հետ կապված: Պաշտպանի խոսքով, Ժիրայր Սեֆիլյանը ոտքի չի կանգնել դատարանի նիստերի դահլիճ մտնելիս, սակայն, դրա համար հիմնավորումներ է ունեցել, որը դատարանը չի ցանկացել լսել եւ միանգամից հեռացրել է նիստերի դահլիճից:

Տիգրան Հայրապետյանն ու Տիգրան Եգորյանը միջնորդեցին իրենց պաշտպանյալներին ներկայացնել նիստերի դահլիճ: Դատարանը նշեց, որ ամբաստանյալների նկատմամբ սանկցիա է կիրառվել դատական կարգը խանգարելու համար եւ եթե փաստաբանները երաշխավորում են, որ պաշտպանյալների կողմից դատական կարգի խախտում չի լինի, ապա միջնորդությունը ենթակա է բավարարման: Տիգրան Հայրապետյանը նշեց, որ եթե իր պաշտպանյալը ոտքի չի կանգնել, ապա առաջին դեպքում պետք է նախազգուշացում լիներ, ոչ թե միանգամից հեռացներ նիստերի դահլիճից:

Դատական նիստը շարունակվում է: Այսօրվա նիստին ներկա չեն ամբաստանյալներ Ժիրայր Սեֆիլյանը, Ներսես Ժողոսյանն ու Գեւորգ Սաֆարյանը, նրանց նկատմամբ դատարանը նախորդ դատական նիստին դատական սանկցիա էր կիրառել եւ հեռացրել նիստերի դահլիճից. Սեֆիլյանը՝ 6 ժամով, Ներսես Պողսյանը՝ 5 ժամով, իսկ Սաֆարյանը՝ 3 ժամով:

Ժիրայր Սեֆիլյանին մեղադրանք է առաջադրվել մի խումբ անձանց հետ նախնական համաձայնությամբ, 24.04.2015 թվականին Երեւան քաղաքում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014 թվականի մայիսից դրա կազմակերպմանն ուղղված նախապատրաստական գործողություններ կատարելու համար:

Գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն արվում են արտագնա` Շենգավիթ վարչական շրջանի ընդհանուր իրավասության դատարանում: