Թուրք-քրդական հարաբերությունները լարման նոր փուլ են մտել. Մուշեղ Խուդավերդյան

«Թուրք-քրդական հարաբերությունները օր օրի թեժանում են»,- Orer.am-ի հետ զրույցում նման տեսակետ հայտնեց թուրքագետ Մուշեղ Խուդավերդյանը. «Խոսքն ինչպես Թուրքիայում գտնվող «Քրդական բանվորական կուսակցության» հետ հարաբերությունների, այնպես էլ Սիրիայում և Իրաքում գտնվող քրդական կառույցների մասին է:

Նկատենք, որ Էրդողանի կողմից բավական բացասական ընդունվեց Իրաքի քրդական ինքնավար պետության առաջնորդ Մասուդ Բարզանիի խոսքներն այն մասին, որ իրենք սեպտեմբերի 23-ին պատրաստվում են հանրաքվե անցկացնել: Ինչպես հայտարարել էր Էրդողանը, այդ ամենը չի բխում Թուրքիայի շահերից, եւ իրենք անելու են ամեն ինչ, որ քրդերը չդառնան ուժ, գործոն Մերձավոր Արեւելքում»:

Ի դեպ, Էրդողանը ռուսական «Իզվեստիյա» թերթին տված հարցազրույցում հայտարարել էր, որ իրենք պատրաստ են «Եփրատի վահան» օպերացիայի նման եւս մեկ ռազմական օպերացիա իրականացնել Սիրիայի քրդերի դեմ, որն էլ կործանիչ հարվածներ կհասցնի Սիրայի քրդերին: Նա թույլ չի տա, որ Սիրիայի քրդերը տեղում ստեղծեն ինքնավար քրդական կազմավորում:

Թուրքագետը նաեւ նշեց, որ իրավիճակը թուրքերի ու քրդերի մեջ բավական լարված է Թուրքիայի հարավում. «Բավական ակտիվացել են «Քրդական բանվորական կուսակցության» զինյալները, ովքեր սկսել են կրկին ինքնաշեն ռումբեր դնել ճանապարհներին, որոնց հետեւանքով պայթում են թուրքական ռազմական մեքենաներ ու մահանում են թուրք զինվորներ»: