Վերանորոգել են ԱԺ պատուհանները, պոմպակայանն ու կոյուղին. նախորդ տարի ԱԺ-ն ծախսել է շուրջ 5 մլդ դրամ

2016 թ-ին ԱԺ-ի բյուջեի կատարողականը կազմել է 99.7 տոկոս, 22 մլն վերադարձվել է պետական բյուջե: Այս մասին ԱԺ-ում 2016 թ. պետական բյուջեի կատարողականի քննարկման ժամանակ ասաց ԱԺ աշխատակազմի ղեկավար Արա Սաղաթելյանը:
Նրա խոսքով՝ պետական բյուջեից հինգ հիմնական ծրագրերի մասով հատկացվել է 4 մլրդ 787 մլն դրամ, փաստացի ծախսերը կազմել են 4 մլրդ 766 մլն դրամ:

Սաղաթելյանը հայտնեց, թե խորհրդարանի հիմնական ծախսը եղել է ԱԺ աշխատակազմի պահպանման ծախսերը: «Ծախսվել է 4 մլրդ 489 մլն դրամ, որից 3 մլրդ 325 մլն դրամը կամ 74.1 տոկոսը կազմում են վճարված աշխատավարձերը: Կոմունալ ծառայությունների, գործողումների, ներկայացուցչական, տրանսպորտային ծախսերը կազմել են 1 մլրդ 164 մլն»,- ասաց նա:

Արա Սաղաթելյանն ընդգծեց, որ ԱԺ-ին հատկացված ծրագրով վերանորոգվել է ԱԺ վարչական շենքը, արտաքին պատուհանների մի մասը, թարմացվել են պոմպակայանն ու ջրամատակարարման և կոյուղու համակարգի որոշակի հատվածը:

Ըստ նրա՝ միջազգային կառույցների անդամակցության վճարների համար ծախսվել է 192.5 մլն, վարչական օբյեկտների հիմնանորոգման համար՝ 82 մլն դրամ: Պետական աշխատողների և ծառայողների սոցիալական փաթեթով ապահովելու ծրագրով ծախսվել է 41 մլն դրամ. ծրագիրն ունի 592 շահառու:

«Ազգային Ժողովը 2016-ին ունեցել է ֆինանսական որոշ խնդիրներ, որոնք լուծելու համար կատարվել են ներքին վերաբաշխումներ՝ ընդհանուր առմամբ 181 մլն դրամի չափով»,-նշեց ԱԺ աշխատակազմի ղեկավարը: