Չեմ կարծում, որ ժողովուրդը երկրորդ պլան է մղվում, որովհետև նույն ընտրիչներին ընտրելու է ժողովուրդը. Հ. Սահակյան

Սահմանադրության 1-7 գլուխների նախնական տարբերակի հրապարակումով մենք այն դարձրեցինք ավելի հրապարակային: Tert.am-ի հետ զրույցում ասաց ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը՝ հավելելով, թե որպես պետաիրավական հարցերի մշտական հանձնաժողովի նախագահ հարցումներ է անցկացրել, և տեղյակ է, որ Սահմանադրության հետ կապված հանրությունը մեծ հետաքրքրություն ունի և պետք է դրան ավելի բովանդակալից ծանոթանա:

«Հանրության մոտ խնդիր առաջացնող հարցերից մեկն էլ այն է, որ  հասարակությունը Սահմանադրության բովանդակությանը ծանոթ չէ: Հիմա արդեն հիմնական հետաքրքրություն ներկայացնող յոթ հիմնական գլուխները դարձել են հանրության քննարկման առարկա»,- ասաց Հովհաննես Սահակյանը:

Դիտարկմանը, թե փոփոխությունների տարբերակում նշվում է, որ երկրի Նախագահն ընտրվում է ընտրիչների կողմից, այսինքն՝ ժողովուրդն ուղղակի մասնակցություն չի ունենում այդ գործում, դա երկրորդ պլան չի՞ մղում ժողովրդին, Հովհաննես Սահակյանը պատասխանեց, որ դա այդպես չէ, քանի որ խորհրդարանական կառավարման երկրներում կառավարման առումով կա երկու տարբերակ։

«Նախագահին կա՛մ խորհրդարանն է ընտրում, կա՛մ ընտրվում է ընտրիչների միջոցով: Ընտրիչների միջոցով ընտրելը նախագահին տալիս է առավել ինքնուրույնություն, անկախություն, որովհետև խորհրդարանական կառավարման դեպքում, կարծես թե, իշխանության հիմնական ուժը կենտրոնացած էր խորհրդարանում, և խորհրդարանն է ձևավորում կառավարությանը, որն էլ պատասխանատու է ամբողջ կառավարության գործունեության համար և հաշվետու է խորհրդարանին»,– ասաց նա:


Հիշեցնենք, որ  սահմանադրական բարեփոխումների մասնագիտական հանձնաժողովը հրապարկել է հայեցակարգի նախնական տարբերակը, որով առաջարկվում է անցում կատարել կառավարման խորհրդարանական մոդելին, թեև մնում է ավելի թույլ լիազորություններով նախագահի ինստիտուտը՝ ընտրիչների միջոցով: Իսկ վարչապետին էլ տրվում են ավելի ընդլայնված լիազորություններ:

Հովհաննես Սահակյանը նշեց, որ անկուսակցական նախագահը 7 տարով ընտրվելու դեպքում դառնում է առավել անկախ, ինքնուրույնություն է ձեռք բերում: «Չեմ կարծում, որ ժողովուրդը երկրորդ պլան է մղվում, որովհետև նույն ընտրիչներին ընտրելու է ժողովուրդը»,– ավելացրեց նա:
 

Ինչ վերաբերում է ընտրիչներին ընտրելու մեխանիզմին, Հովհաննես Սահակյանն ասաց, որ այն հետագայի կարգավորման խնդիր է՝ քննարկումների արդյունքում այլ օրենքների միջոցով մանրամասնել, թե ինչ կարգով և ինչպես:

«Իշխանությունը պատկանում է ժողովրդին, դա ամրագրված է բոլոր երկրների սահմանադրությունների մեջ, և այդ իշխանությունը ժողովուրդն իրականացնում է ուղղակի և անուղղակի ընտրությունների միջոցով»,- ասաց նա:

Հարցին, թե երբ է նախատեսվում քաղաքական կուսակցությունների հետ քննարկումներ իրականացնել Սահմանադրության փոփոխված տարբերակի շուրջ, Հովհաննես Սահակյանն ասաց, որ կուսակցություններն իրենց ներսում պետք է իրականացնեն այդ քննարկումները և երբ պատրաստ կլինեն, կլինի ընդհանուր քննարկում:

«Մենք արդեն մեր կուսակցության ներսում սկսել ենք քննարկումները, որպեսզի մենք էլ ավելի բովանդակային ունենանք մեր միասնական տեսակետը, վերաբերմունքը»,- ասաց նա: