«Սասնա ծռեր» խմբի 14 անդամների գործով ընդմիջված նիստը վերսկսվեց (Ֆոտո)

Երեւանի Ավան եւ Նոր Նորք վարչական շրջանների ընդհանուր իրավասության դատարանում քիչ առաջ վերսկսվեց «Սասնա ծռեր» խմբի 14 անդամներով գործով արտագնա դատական նիստը:

Նշենք, որ այսօր մեկ ժամ ուշացումով մեկնարկած դատական նիստն ընդմիջվել էր, քանի որ փաստաբանները թույլ չէին տվել խուզարկել իրենց եւ հրաժարվել էին ներս մտնել: Ընդմիջումից հետո հայտնի դարձավ, որ նիստերի դահլիճ են մտել մի քանի փաստաբան, այդ թվում, Արմինե Ֆանյանը, Հարություն Բաղդասարյանը, Մարինե Ֆարմանյանը, Ինեսա Պետրոսյանը, Արա Ղարագյոզյանը: Ավելի ուշ նիստերի դահլիճ եկան նաեւ փաստաբաններ Երվանդ Վարոսյանը, Արայիկ Պապիկյանը, Տիգրան Հայրապետյանը:

Նիստը շարունակվում է, չնայած կան բացակա փաստաբաններ: Նիստերի դահլիճը հսկում են մեծ թվով ոստիկաններ:

Նշենք, որ այսօր առավոտից դատական կարգադրիչները փորձում են խուզարկել պաշտպաններին, սակայն նրանք թույլ չեն տալիս: Հետաքրքիր է, որ այսօր նույնիսկ փորձել են անձնական զննություն կատարել փաստաբան Մարինե Ֆարմանյանի նկատմամբ, սակայն վերջինս հրաժարվել էր:

Այս գործը քննվում է Էրեբունի եւ Նուբարաշեն վարչական շրջանների ընդհանուր իրավասության դատարանի կողմից, սակայն նիստերն արտագնա են անցկացվում, քանի որ այնտեղ դահլիճը փոքր է:

Ըստ մեղադրական եզրակացության՝ 2016թ. հուլիսի 17-ին ժամը 05:00-ի սահմաններում կազմակերպված խմբի անդամները զինված հարձակում են գործել ոստիկանության Երեւանի վարչության պարեկապահակետային ծառայության գնդի վարչական շենքերի վրա՝ Խաչատուր Գիչյանի տրամադրած «ԿՌԱԶ-256 Բ1» մակնիշի բեռնատարով հարվածելով կոտրել են գնդի վարչական տարածքի մուտքի գլխավոր դարպասներն ու քանդել կից պարիսպի մի հատվածը, իրենց մոտ ապօրինի պահվող հրազենի գործադրմամբ, ներխուժել են գնդի տարածք, զավթել եւ պահել են գնդի վարչական շենքերը, շինություններն ու տարածքում գտնվող տրանսպորտի միջոցները, ինչպես նաեւ նույն եղանակով պատանդ են վերցրել ոստիկանության աշխատակիցների:

Հարձակման ընթացքում կազմակերպված խմբի անդամներից Սմբատ Բարսեղյանն ինքնաձիգից արձակված կրակոցով, պատանդ վերցնելով զուգորդված, դիտավորությամբ ապօրինաբար կյանքից զրկել է ՊՊԾ գնդի հրամանատարի տեղակալ, պատասխանատու հերթապահ, ոստիկանության գնդապետ Արթուր Վանոյանին, իսկ նույն հանգամանքներում Արմեն Բիլյանը՝ գնդի հերթապահի օգնական, ոստիկանության ավագ ենթասպա Գագիկ Մկրտչյանին:

Արմեն Բիլյանը կազմակերպված խմբի այլ անդամների հետ գույքի գաղտնի հափշտակություն կատարելու դիտավորությամբ, 2016 թվականի հուլիսի 23-ից 27-ն ընկած ժամանակահատվածում, գնդի տարածքում գտնվող գեներատորի գործարկմամբ, էլեկտրական սղոցով կտրել են ՊՊԾ գնդի պարսպի մեջ ներկառուցված «Ակբա-Կրեդիտ Ագրիկոլ Բանկ» ՓԲ ընկերության բանկոմատի հետնամասի դռների ծխնիները, բացել բանկոմատը եւ այնտեղից գաղտնի հափշտակել 14 մլն 808 հազար դրամը:

2016 թվականի հուլիսի 30-ին՝ ժամը 18-ի սահմաններում, Սմբատ Բարսեղյանն օպտիկական նշանառության սարքով «ՍԿՍ» տեսակի ակոսափող հրազենից արձակված կրակոցով դիտավորությամբ ապօրինաբար կյանքից զրկել է ոստիկանության զորքերի զորամասի զինծառայող, ոստիկանության ենթասպա Յուրի Տեփանոսյանին:

Նախաքննությամբ հաստատվել է նաեւ, որ Խաչատուր Գիչյանը օժանդակել է շենքեր, շինություններ եւ տրանսպորտի միջոցներ զավթելուն, իսկ Կարո Եղնուկյանը՝ զավթածն ու պատանդներին պահելուն: