Որոնք են անբացատրելի հազի ամենատարածված պատճառները

Շատերը կարծում են, որ հազը թոքերի հիվանդության նշան է, սակայն երբեմն երկարատև հազի դեպքում չեն օգնում ո՛չ դեղահաբերը, ո՛չ էլ ժողովրդական միջոցները: Բանն այն է, որ երբեմն հազը կարող է պայմանավորված լինել շնչառական օրգանների հետ կապ չունեցող խնդիրներով:

Ձեր ուշադրությանն ենք ներկայացնում անբացատրելի հազի ամենատարածված պատճառները.

1.      Ստամոքսի աշխատանքի խանգարումներ

Առավել հաճախ հազը պայմանավորված է լինում ստամոքսի սխալ աշխատանքով՝ բարձր թթվայնությամբ և կերակրափողի ստորին սֆինկտերի թուլությամբ: Երբ ստամոքսահյութին խառնված սնունդը դուրս է մղվում կերակրափող, առաջանում է գրգռվածություն, այրոց ու հազ, քանի որ կերակրափողի այդ հատվածից ոչ շատ հեռու գտնվում են նաև հազային ընկալիչները:

Կան սննդամթերքի տեսակներ, որոնք նպաստում են սֆինկտերի թուլացմանն ու այրոցի առաջացմանը: Դրանց շարքին են դասվում մենթոլ ու անանուխ պարունակող սննդամթերքը, անանուխով մաստակը, գազավորված ըմպելիքները և մեծ քանակությամբ սուրճն ու շոկոլադը, ուստի նման խնդիրներից խուսափելու համար հարկավոր է սահմանափակել նման սննդամթերքի օգտագործումը:

Նման դեպքերում բժիշկները նշանակում են ստամոքսի թթվայնությունը նվազեցնող դեղամիջոցներ, որոնք օգնում են ազատվել այրոցից ու հազից:

2.      Չբուժված հարբուխ

Բացի այդ, լինում են դեպքեր, երբ հարբուխի ժամանակ քթի խոռոչում կուտակված լորձը հոսում է ետ և գրգռում կոկորդում եղած հազային ընկալիչները: Հատկապես հաճախ է հազն անհանգստացնում հորիզոնական դիրք ընդունելու դեպքում:

Այս ամենից կարելի է ենթադրել, որ հազի պատճառ կարող է լինել նաև չբուժված հարբուխը: Այս դեպքում հազից ազատվելու միակ տարբերակը քթի խոռոչները լորձից մաքրելն է:

3.      Սրտի հիվանդություններ

Շատերը գլխի չեն ընկում, որ հազը կարող է պայմանավորված լինել նաև սրտի հիվանդություններով: Սրտամկանն անմիջականորեն կապված է արյունատար համակարգի և արյան հոսքի հետ, ուստի լինում են դեպքեր, երբ սրտի աշխատանքի և արյան հոսքի խանգարման հետևանքով թոքերում արյունը «լճանում» է, ինչն էլ դառնում է հազի պատճառ:

Նման դեպքերում հիվանդները սովորաբար քնելիս նախընտրում են գլուխը կամ մարմնի վերին հատվածը սովորականից բարձր պահել: Եթե մարդը չի կարողանում փոքրիկ բարձով քնել հազի անտանելի նոպաների պատճառով, ապա հարկավոր է անհապաղ բուժզննում անցնել, քանի որ դա կարող է լինել սրտի արատի ախտանշան:

Նյութի աղբյուրը՝ lady-21vek.ru