Տուլայի վթարից տուժած 15-ամյա ՀՀ քաղաքացին կվիրահատվի. ԱԻՆ-ը նոր մանրամասներ է հայտնում

Հունիսի 20-ին, ժամը 12:00-ին ՌԴ-ում ՀՀ դեսպանատանը ԱԻՆ ներկայացուցիչ փ/ծ գնդապետ Ա. Ղազարյանից տեղեկություն է ստացվել, որ Տուլայում տեղի ունեցած ավտովթարի հետեւանքով Ստուպինո քաղաքի հիվանդանոցում գտնվող 3 տուժածի առողջական վիճակը մնում է նույնը (միջին ծանրության), Տուլայի ԲԿ-ում գտնվող Ռոզա Գեղամյանը (2005 թ.) այսօր դուրս կգրվի, իսկ վերջինիս եղբայր Կառլեն Գեղամյանը (2002 թ.) կենթարկվի վիրահատության: Գեղամյանների մոր՝ Աիդա Հակոբյանի (1983 թ.) վիճակը մնում է նույնը (միջին ծանրության):

Հայաստանի ԱԻՆ-ից NEWS.am-ին հայտնում են, որ հունիսի 18-ին Ռուսաստանի Դաշնության Տուլայի շրջանում` Մ-4 դաշնային ավտոճանապարհի Մոսկվա-Երեւան հատվածի 133-րդ կմ-ին, տեղի էր ունեցել ՃՏՊ՝ բախվել էին «ԿամԱԶ» մակնիշի բեռնատար ավտոմեքենան եւ «Իվեկո» մակնիշի 22 GG 299 պետհամարանիշով միկրոավտոբուսը (որում եղել են 20 քաղաքացի)։

Պատահարի հետեւանքով մահացել էր 1 անձ՝ ՌԴ քաղաքացի 1961 թ. ծնված Նասիրով Օթարը, տուժել՝ 9 քաղաքացի, որոնց թվում՝ ազգությամբ հայեր: Տուժածներից 6-ը տեղափոխվել էր Ստուպինո, 3-ը` Տուլա քաղաքի հիվանդանոց։ Նրանց մի մասը հետագայում դուրս էր գրվել։

Առողջապահության նախարարությունից էլ հայտնում են, որ կատարված հետազոտությունների արդյունքում ճշտվել են ախտորոշումները. հիվանդանոցում գտնվողներից գրեթե բոլորի մոտ առկա է գլխուղեղի ցնցում եւ ոսկրերի տարաբնույթ կոտրվածքներ: Տուժածներից 4-ի առողջական վիճակը գնահատվում է միջին ծանրության, 2-ինը` բավարար: