Կատարվել են Արցախի փոքր ավիացիայի առաջին քայլերը. Ազատ թռիչք ազատ Արցախի վրայով (ֆոտո)

Սպիտակ փոքր օդանավը վեր է խոյանում եւ սլանում Ստեփանակերտի օդանավակայանի շենքի վրայով: Ոչ հեռվում ճախրում է շարժիչային պարապլանի նարնջագույն թեւը: Հեռվից թվում է, թե երկնքում բզզացող վառ թիթեռներ են թռվռում: Հունիսի 17-ին Լեռնային Ղարաբաղում առաջին անգամ անցկացվեց «Արցախ էյր ֆեստ» օդային փառատոնը  (ֆոտոռեպորտաժ) :

Վառ գունագեղ տեսարան, որի հյուրերը կարողացան ոչ միայն հետեւել հեքիաթային ներկայացմանը, այլեւ անմիջական մասնակցություն ունենալ, որը կազմակերպել էին Արցախի Էկոնոմիկայի նախարարությունը եւ «Յելլ էքստրիմ պարկը»: Փառատոնի հիմնական նպատակը տուրիզմի ոլորտի զարգացմանը նպաստելն էր, Արցախի փոքր ավիացիայի պոտենցիալի մասին իրազեկվածության մեծացումը, երիտասարդների ներգրավումը եւ բիզնես նախագծերի նկատմամբ հետաքրքրության խթանումը:

Ինչպես խոստացվել էր, Ստեփանակերտի երկինք բարձրացան թեթեւշարժիչային երկտեղանոց օդանավ, երկտեղանոց շարժիչային պարապլան եւ օդապարիկ: Թռչել ցանկացողների հերթագայության պակաս իսկապես չկար: Ուշագրավ է, որ փառատոնի հյուրերի թվում մեծ թվով արտասահմանցի զբոսաշրջիկներ կային, ըստ որում՝ աշխարհագրությունն ընդգրկում էր Ճապոնիայից միչեւ ԱՄՆ:

Շոուի մասնակիցների հատուկ հետաքրքրությունն առաջացրեց օդանավով թռիչքը: Նախկին ռազմական օդաչու Սամվել Թավադյանը, որը նստեց երկտեղանի օդանավի ղեկին, ցուցադրեց ոչ մեծ (ուղեւորների հարմարավետության նկատառումներով) պիլոտաժի պատկերներ: Ամերիկյան արտադրության CH 701 օդանավը՝ սպիտակ կարմիր եզրավորմամբ թեւերով եւ Արցախի դրոշով  «խոյասլաց» սավառնում էր օդանավակայանի վրա, անցնում դաշտերի վրա խուզող թռիչքի, ճոճում թեւերը, նմանակում խոչընդոտից «խուսափում»:

NEWS.am-ի հետ զրույցում օդաչուն նշեց, որ արցախցի երիտասարդների շրջանում փոքր ավիացիայի նկատմամբ մեծ հետաքրքրություն կա: «Անցյալ տարի իրականացվել են նախապատրաստական թռիչքներ: Այս տարի արդեն սկսել են թռչել»,- նշեց Սամվել Թավադյանը: Օդաչուն արտասահմանցի զբոսաշրջիկների մեծ թիվ արձանագրեց, որոնք հետաքրքրություն են արտահայտում Արցախի երկնքում տուրիստական թռիչքների նկատմամբ: Թռիչքներն իրականացվում են Ստեփանակերտ-Շուշի-Ստեփանակերտ երթուղով (առանց Շուշիում վայրէջք կատարելու) եւ կոչվում են «Ազատ թռիչք ազատ Արցախի վրա»: «Թռիչքներն առայժմ միայն տուրիստական են, ապագայում հույս ունենք նաեւ ուսումնական թռիչքներ սկսել»,- ասաց Թավադյանը, որի ընտանիքում արդեն երկրորդ սերունդն է նախապատվությունը երկնքին տալիս՝ որդին ռազմական օդաչու է դառնալու:

Փառատոնի հյուրերը հնարավորություն ունեցան փորձելու ղարաբաղյան խոհանոցի ճաշատեսակները: Հատկապես արտասահմանցի հյուրերը նախապատվությունը տվեցին ղարաբաղյան ավանդական ժենգյալով հացին:

Փառատոնի երկրորդ կեսին ելույթ ունեցան Puzzle's 5 peaces խումբը (Իջեւանից), տեղական «Շուշվա Բենդ» եւ Երեւանից «Նեմրա» խմբերը: Փառատոնի համերգային մասը կրճատվեց Ադրբեջանի ԶՈւ-ի կողմից հրադադարի ռեժիմի հերթական խախտման եւ 4 հայ զինծառայողների զոհվելու պատճառով:

«Հնարավոր է, որ սահմանի այն կողմում մեզ լսում են, եւ այնտեղ կհասկանան, որ խաղաղ մարդկանց վրա հարձակվելը վատ է»,- նշեց «Շուշվա Բենդի» մենակատարը: Ելույթի լեյտմոտիվը դարձավ ղարաբաղցիների ոգու եւ կամքի ամրության պահպանումը:

Մինչեւ ուշ երեկո Ստեփանակերտի օդանավակայանի երկնքում նկատելի էր լուսարձակող բազմագույն օդապարիկը եւ լսվում էր շարժիչների աղմուկը: