Եթե Սահմանադրությունը չփոխենք՝ երկրին անհրաժեշտ համակարգային փոփոխությունները կհետաձգվեն ևս 5-10 տարով. Մ. Եսայան

Քաղաքականություն 18 Հուլիս, 2015 0:17

ԱԺ «Հանրապետական» խմբակցության պատգամավոր Մարգարիտ Եսայանը, Tert.am-ի հետ զրույցում կարևորելով սահմանադրական բարեփոխումները նշեց, թե երկրին անհրաժեշտ է համակարգային փոփոխություններ, որը կիրականացվի միմիայն Սահմանադրության փոփոխությամբ: Ըստ նրա, եթե այս պահին մենք Սահմանադրության փոփոխությունները չիրականացնենք, ապա երկրի առջև ծառացած համակարգային փոփոխությունները կհետաձգվեն ևս 5-10 տարով: «Հաջորդ նախագահական ընտրություններին կլինի այլ Նախագահ, ով էլ ուզում է լինի, նա ևս կցանկանա 5 տարի, 10 տարի պաշտոնավարել իրավունքի սահմաններում, արդյունքում անհրաժեշտությունը փոխել համակարգը՝ կհետաձգվի ևս 10 տարի, եթե դա հիմա չարվի»,- ասաց նա:

-Տիկի՛ն Եսայան, երեկ Հանրապետական կուսակցության խորհրդի նիստում սահմանադրական փոփոխությունների նախագծի քննարկմանը ստացա՞ք այն հարցերի պատասխանները, թե ինչու է անհրաժեշտ հիմա այս փոփոխությունների գնալ:

-Կուսակցության աշխատանքային նիստ էր, որի ժամանակ սահմանադրական փոփոխությունների նախապատրաստվող աշխատանքային խմբի ներկայացուցիչները կուսակցության խորհրդի անդամներին ներկայացրեցին այդ փոփոխությունները, որոնք արդեն հրապարակված են: Ներկայացվեց բոլոր այն շեշտադրումները, որոնք կարևորում են, այն ենթադրությունները, թե ինչու այս կամ այն հոդվածը պետք է փոխվի և բացատրությունները լիովին բավարարեցին: Շատերը հարցեր ուղղեցին, որովհետև բոլորին է հուզում խնդիրը և շատ կարևոր պահի առաջ ենք կանգնած, կարևոր փուլ է, երկրի գլխավոր օրենքի փոփոխության հարցն է դրված, և բնականաբար հիմնական փոփոխությունը, որը առաջարկում է աշխատանքային խմբի կողմից՝ երկիրը տանելու է համակարգային փոփոխությունների, այսինքն, եթե մինչ այժմ մենք կիսանախագահական համակարգով երկիր ենք, եթե տեղի ունենա սահմանադրական հանրաքվե և առաջարկվող փոփոխությունները հասարակությունն ընդունի, մենք Սահմանադրական հանրաքվեից հետո դառնալու ենք խորհրդարանական պետություն: Այսինքն՝ այն համակարգային փոփոխությունները, որոնց մասին շարունակաբար տարբեր ուժեր խոսում են, այսօր եթե տեղի ունենա հանրաքվե և հանրաքվեի արդյունքում մեր հասարակությունն «այո» ասի, մենք կունենանք այդ փոփոխությունները: Իմ անձնական տպավորությամբ բավական բարդ շրջան է բոլորիս համար՝ և՛ հասարակության, և՛ քաղաքական ուժերի համար, և՛ իշխանության, և՛ ընդդիմության համար, որովհետև պատասխանատվության բեռը շատ մեծ է, բայց այն տարբերակը, որն առաջարկվել է և տարածվել է՝ վերջնական տարբերակ չէ, այդ մասին նույնպես խորհրդի նիստում խոսվեց, մեզանից և բոլոր քաղաքական ուժերից ակնկալվում է հասարակության լայն շերտերից ակնկալվում է առաջարկություններ, դիտողություններ, որոշ նկատառումներ և աշխատանքային խումբը պատրաստակամ է հաշվի առնելու: Այդ մասին ի դեպ, ասաց նաև Հանրապետության Նախագահը, որ սա վերջնական տարբերակ չէ, սա աշխատանքային տարբերակ է և մենք պատրաստ ենք սկսել քննարկումներ, և յուրաքանչյուր ոք ազատ է անել իր առաջարկությունները: Հույս ունեմ, որ պատվով այս կարևոր փուլը կհաղթահարենք, և որից հետո կունենանք բոլորվին այլ համակարգում գտնվող Հայաստան:

-Իսկ հասարակության ընկալումները հարցի շուրջ բավարա՞ր եք գնահատում, կոնկրետ կա՞ կարիք ավելի մատչելի բացատրության:

-Իհարկե կա կարիք ավելի մատչելի բացատրել հասարակությանը, որովհետև նույնիսկ այն տերմինոլոգիան, որ սահմանադրագետներրը, իրավաբանները բացատրում են, շարքային քաղաքացու համար և մեզնից շատերի համար էլ միշտ չէ, որ միանգամից հասկանալի են, բայց աշխատանքային խումբը պատրաստակամ է, մենք էլ պատրաստ ենք ինչ-որ ժամանակից հետո հասարակական ներկայացուցիչների հետ հանդիպել, քննարկել, բացատրել, հարցերին պատասխանել, այսինքն՝ սա նոր աշխատանքային շրջանն է: Գրեթե վստահ եմ, որ հասարակության լայն շերտեր ավելի տեղեկացված կլինեն բացատրությունների հարցերի պատասխանները կունենան և փոփոխություններն ավելի ընդունելի կլինեն հասարակության լայն շերտերի հարմար:

-Իսկ այն հայտարարությունների՞ն ինչ կպատասխանեք, թե այս փոփոխությունները իշխանությունների վերարտադրության համար է:

-Այդ խոսակցությունները բոլորը տափակաբանություն են, որովհետև եթե այսօրվա իշխանությունն ուզենա վերարտադրվել, բազմաթիվ ձևեր ու հնարքներ ունի վերարտադրվելու համար, այսինքն՝ դրա համար բոլորվին պետք չէ մտնել այս ծանր բեռի տակ, և ավելորդ խնդիր ստեղծել և՛ իր համար, և՛ այս բոլորի համար, աշխատանքային պրոցես ու չարչարանք ստեղծել: Երբեմն ասում են, թե Սերժ Սարգսյանն իր համար է ուզում փոխել Սահմանադրությունը. չկա նման բան, որովհետև եթե իշխանությունն ուզենա վերարտադրվել, էլի եմ ասում, տարբեր ձևեր ունի վերարտադրվելու համար, դրա համար կարիք չկա Սահմանադրությունը փոխելու: Եթե այսօր այս պահին մենք Սահմանադրության համակարգային փոփոխությունները չիրականացնենք, խնդիրը, որ առկա է երկրի առջև, այդ հարցը ևս կհետաձգվի 5-10 տարով, որովհետև հաջորդ նախագահական ընտրություններին կլինի այլ Նախագահ, ով էլ ուզում է լինի և նա ևս կցանական 5 տարի 10 տարի պաշտոնավարել իրավունքի սահմաններում, և բնականաբար չի գնա այդ քայլին, որովհետև կուզենա պաշտոնը վայելել, իսկ անհրաժեշտությունը փոխել համակարգը կհետաձգվի ևս 10 տարի, եթե դա հիմա չարվի: