Պաշտպանը միջնորդեց արդարացնել «Իսոյին»

Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր «Թեւոսիկի» եղբոր` Արթուր Սաֆարյանի սպանության մեջ մեղադրվող Իսրայել Սարգսյանի պաշտպանը միջնորդեց արդարացնել իր պաշտպանյալին: Իսրայել Սարգսյանի փաստաբանը՝ Հեկտոր Սարդարյանը, նշեց, որ դատաքննությամբ չի ապացուցվել իր պաշտպանյալի մեղավորությունը, հետեւաբար նա պետք է ճանաչվի անմեղ:

Իսկ Արթուր Սաֆարյանի հարազատները պահանջում են ցմահ ազատազրկման դատապարտել Սաֆարյանի սպանությունը կազմակերպելու մեջ մեղադրվող Իսրայել Սարգսյանին:Տուժողի իրավահաջորդի ներկայացուցիչ Երեմ Սարգսյանը   հայտարարեց, որ մեղադրանքը հիմնավորված է, Իսրայել Սարգսյանը պետք է ստանա առավելագույն պատիժը:  «Ես նույնպես համարում եմ, որ Իսրայել Սարգսյանին առաջադրված մեղադրանքը հինմնավորվել է: Ինձ համար ողջ դատաքննության ընթացքում չբացահայտվեց այն հանգամանքը, թե ինչու ինքնախոստովանություն տեղի ունեցավ»,- ասաց Երեմ Սարգսյանը:

Դատական նիստը հետաձգվեց եւ նշանակվեց հունիսի 19-ին:

Հիշեցնենք, որ 41-ամյա Արթուր Սաֆարյանը` քրեական հեղինակություն «Թեւոսիկի» եղբայրը սպանվել է 2014թ. հունվարի 27-ին: Նրա սպանության գործով կալանավորվել էր Իսրայել Սարգսյանը, որը Գոռ Վարդանյանի գլխավորած «Դուքենդո» ֆեդերացիայի անդամներից է, եւ Տիգրան Ասատրյանին, որն ավելի ուշ ազատ է արձակվել: Քրեական գործով պարզվել էր, որ Իսրայել Սարգսյանն իր ընկեր Մովսես Ներսիսյանին պատվիրել է կատարել Արթուր Սաֆարյանի սպանությունը, իսկ կատարելուց հետո Մովսեսին սպանել է, դին տեղափոխել է Քանաքեռավանի դաշտ եւ նետել կոյուղու դիտահորը: Իսրայել Սարգսյանին մեղադրանք է առաջադրվել Քրեական օրենսգրքի 38-104-րդ հոդվածի 8-րդ կետով, 104-րդ հոդվածի 2-րդ մասի 11-րդ կետով եւ 235-րդ հոդվածի 1-ին մասով:

Տիգրան Ասատրյանի մասով նախաքննությունը դեռ շարունակվում է: