Մեղադրողը պահանջեց Անի Զախարյանին դատապարտել 3 տարվա պայմանական ազատազրկման

Երեւանի Խորենացի փողոցում անցած տարվա հուլիսի 19-ին ոստիկանության մեքենայի ապակին կոտրելու հրահանգներ տալու մեջ մեղադրվող` Հայաստանի «Նոր քաղաքական մշակույթ» կուսակցության նախագահ Անի Զախարյանի համար մեղադրողն այսօր` հունիսի 14-ին, պահանջեց պայմանական ազատազրկում:

Երեւանի Կենտրոն եւ Նորք-Մարաշ վարչականշրջանների ընդհանուր իրավասության դատարանում դատախազ Վահան Հարությունյանը նշեց, որ ամբաստանյալի մեղավորությունն ապացուցված է:

«Միջնորդում եմ դատապարտել երեք տարվա ազատազրկման, սակայն կիրառելով 70-րդ հոդվածը` պատիժը պայմանականորեն չկիրառել եւ սահմանել փորձաշրջան չորս տարվա ժամկետով»,- ասաց մեղադրողը:

Պաշտպանական կողմը ժամանակ խնդրեց պատրաստվելու համար: Դատական նիստը հետաձգվեց եւ նշանակվեց հունիսի 28-ին:

Ըստ մեղադրական եզրակացության` Անի Զախարյանը հուլիսի 19-ին ժամը 20-ի սահմաններում Երեւանի Խորենացի եւ Քրիստափոր խաչմերուկում ինքնաբուխ հանրահավաքի ընթացքում բարձրախոսով հնչեցրել է կոչեր եւ դրդել մի խումբ ինքնությունները չպարզված անձանց կոտրել եւ վնասել այդ պահին հիշյալ խաչմերուկում իր ծառայողական պարտքը կատարող ոստիկանության մեքենան, որի մեջ եղել են ոստիկանության ծառայողներ:

Անի Զախարյանին մեղադրանք է առաջադրվել Քրեական օրենսգրքի 38-185-րդ հոդվածի 2-րդ մասի 3-րդ կետով, այն է` ուրիշի գույքը դիտավորությամբ ոչնչացնելուն կամ վնասելուն դրդելը, որը կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ: Խափանման միջոց է ընտրվել ստորագրություն չհեռանալու մասին: