Կարող է Արամ Ասատրյանի անվան փողոցը իրականություն դառնալ, իսկ Լեոնիդ Ազգալդյանինը մնա ցանկություն. ակտիվիստ

Երեւանում Լենինգրադյան փողոցն Լեոնիդ Ազգալդյանի անունով անվանակոչելու՝ «Աջակցենք սահմանամերձ բնակավայրերին» քաղաքացիական նախաձեռնության կողմից անցկացրած ստորագրահավաքին միացել է 8932 քաղաքացի: Այս մասին, այսօր՝ հունիսի 21-ին, լրագրողների հետ հանդիպմանն ասաց «Աջակցենք սահմանամերձ բնակավայրերին» քաղաքացիական նախաձեռնության անդամ, մանկավարժ Լեւոն Զաքարյանը։

«Կա համապատասխան օրենք, որի շրջանակներում հետեւյալ կերպ է ընթանում այս ընթացակարգը․ պետք է լինի ստորագրության իրավունք ունեցող քաղաքացիների՝ այսինքն 16 եւ բարձր տարիքի մարդկանց մեկ տոկոսի ստորագրությունը։ Քանի որ հստակ տվյալներ չունեինք Երեւան քաղաքի բնակչության մասին, վերցրել ենք 1 միլիոն։ Մեկ միլիոնի դեպքում հանելով մինչեւ 16 տարեկաններին մենք ստացանք 800 հազար։ Դրա մեկ տոկոսը 8 հազարն է։ Ու դրանով որոշեցինք, որ 8 հազար ստորագրությունով կկարողանանք հարցը բարձրացնել քաղաքապետարանում»,- ասաց նա։

Զաքարյանի խոսքով, իրենք պատասխան ստացել են միայն փետրվարի 17-ին. «Պարզաբանումների ընթացքում մեզ ասացին, որ ամեն ինչ արվել է պատշաճ ձեւով, ամեն ինչ նորմալ է, բայց գոյություն ունի հետեւյալ հիմքը, որ չորս ամսվա ընթացքում դա կարող են դնել ավագանիների նիստի քննարկմանը։ Այսօր հունիս ամիսն է եւ այդ չորս ամիսը արդեն անցել է»,- ասաց Զաքարյանը:

Իր հերթին, «Աջակցենք սահմանամերձ բնակավայրերին» քաղաքացիական նախաձեռնության անդամ Սոֆյա Հովսեփյանը նշեց, որ շուրջ չորս ամիս առաջ հարցը դրել են Երեւանի ավագանու քննարկման, բայց այն այդպես էլ չի քննարկվել: Նրա խոսքով,  նոր ավագանու ձեւավորումից հետո Երեւանի ավագանին գնալու է արձակուրդ մինչեւ սեպտեմբեր, ինչը նշանակում է, որ հարցն այդպես էլ չի քննարկվի մինչեւ աշուն:

«Եթե այս հարցն արժեւորվեր, ապա ի սկզբանե քննարկման կդրվեր ավագանու նիստում: Բայց կա արժեքների խնդիր, փորձում են ամեն կերպ ազգային հերոսներին մոռացության մատնել: Չգիտես ինչու՝ կարող է Արամ Ասատրյանի անվան փողոցը իրականություն դառնալ, իսկ Լեոնիդ Ազգալդյանի անվան փողոցը մնա միայն ցանկություն: Ազգային հերոսներին մոռացության մատնելու խնդիր է դրված»,- ասաց Սոֆյա Հովսեփյանը:

Հիշեցնենք, որ Երեւանում Լենինգրադյան փողոցն Լեոնիդ Ազգալդյանի անունով անվանակոչելու համար անցկացրած ստորագրահավաքը սկսվեց դեռ 2016 թվականի հոկտեմբերին։