Տրանսպորտի նախարարությունը կոչ է անում տաքսի ծառայություններին գործել օրենքի շրջանակներում

ՀՀ տրանսպորտի, կապի եւ տեղեկատվական տեխնոլոգիաների նախարարությունը կոչ է անում տաքսի ծառայություն մատուցողներին գործել օրենքի շրջանակներում եւ ձեռնպա՛հ մնացլ նախարարության հետ միջնորդավորված իրավահարաբերությունից: Այս մասին այսօր՝ հունիսի 8-ին, հայտարարություն է տարածել ՀՀ տրանսպորտի, կապի եւ տեղեկատվական տեխնոլոգիաների նախարարության լրատվական ծառայությունը:

«Ավտովարորդների իրավունքների պաշտպանության լիգա» ՀԿ նախագահ Տիգրան Հովհաննիսյանն իր երեկվա մամուլի ասուլիսում անդրադարձել է տաքսի ծառայությանն առնչվող մի շարք հարցերի:

Մի կողմ թողնելով իրավական ակտերի կամայական մեկնաբանությունները՝ հարկ ենք համարում նշել, որ ասուլիսում հնչած հայտարարությունները, մեղմ ասած, որեւէ կապ չունեն իրականության հետ:

Նախարարությունը մշտապես հանդես է եկել բաց, թափանցիկ աշխատաոճի օգտին: Հասարակական բոլոր շերտերի, առավել եւս՝ բանախոսի եւ նրա «շահառու» տաքսու վարորդների առաջ նախարարության դռները միշտ բաց են եղել:

Դրա վկայությունն են նախարարի, նրա տեղակալների, համապատասխան ստորաբաժանումների ղեկավարների մոտ տաքսու վարորդների, ուղեւորափոխադրողների եւ հենց իր մասնակցությամբ  մինչ այսօր տեղի ունեցած բազմաթիվ հանդիպումներն ու քննարկումները, որոնք ամենայն մանրամասնությամբ լուսաբանվել են եւ՛ զանգվածային լրատվամիջոցներում, եւ՛ նախարարության պաշտոնական կայքում:

Ոլորտում, իրոք, կան լուծման կարիք ունեցող բազմաթիվ հարցեր, որոնց ուղղությամբ նախարարությունը հետեւողական աշխատանք է կատարում: Բնականաբար առաջնահերթ գերակայություն է տրվում ոչ թե անօրինական գործունեության անընդունելի փառաբանումներին, երկարաշունչ, բայց որեւէ հոդաբաշխ միտք չարտահայտող մերկապարանոց հայտարարություններին, այլ հասարակությանը մատուցվող ծառայությունների որակի եւ արդյունավետության բարձրացմանը:

Դրան են միտված նաեւ «Ավտոմոբիլային տրանսպորտի մասին» ՀՀ օրենքում եւ մի շարք այլ իրավական ակտերում փոփոխություններ եւ լրացումներ կատարելու մասին ՀՀ օրենքների նախագծերը: Ի դեպ, այդ նախագծերը դեռեւս մայիսի 22-ից հրապարակված են նախարարության պաշտոնական կայքի «Իրավական ակտերի նախագծեր» բաժնում, մատչելի ու տեսանելի են երկրի ամբողջ տարածքում, պարզ եւ հասանելի՝ հասարակական հնարավոր բոլոր շերտերի համար: Սակայն  առ այսօր նա, նախարարությունում ձեւավորված տաքսի ծառայությունների ոլորտի բարեփոխումներով զբաղվող աշխատանքային խմբի անդամ լինելով հանդերձ, այդ նախագծերից եւ ոչ մեկի վերաբերյալ որեւէ գրավոր առաջարկություն չի ներկայացրել: Այնպես որ, այդ պնդումը եւս իրականության հետ գոնե մոտավոր աղերս չունի:

Փոխարենը նա հանդես է գալիս անօրինական գործունեություն ծավալելու օգտին, ընդ որում՝ շատ լավ գիտակցելով վարորդների համար դրա հետեւանքները:

Անդրադառնալով հասարակական խորհրդի վերաբերյալ դարձյալ իրականության հետ կապ չունեցող «փաստարկին»՝ նշենք, որ այդ կառույցը ձեւավորվել է 2014թ. մայիսին, դրան մասնակցելու հնարավորություն ունեն չափորոշիչներին համապատասխանող բոլոր հասարակական միավորումներն ու կազմակերպությունները:

2016 թվականին նախարարությունը հասարակական խորհրդին անդամակցելու առաջարկով 3 անգամ հանդես է եկել պաշտոնական հայտարարությամբ, սակայն վերոնշյալ լիգան երբեւէ չի դիմել: Ուստի սեփական անգործության համար պետական մարմնին մեղադրելը չի տեղավորվում գրագետ իրավահարաբերությունների եւ գործակցության շրջանակներում:

Ինչ վերաբերում է տաքսի ծառայություն մատուցողների համար հնչող իբր մտահոգություններին, ապա նախարարությունը ոչ պակաս մտահոգ է նրանց հոգսերով եւ դրանք այս կամ այն ծավալով իրենց արտահայտությունն են գտնում նախարարության թե՛ ամենօրյա եւ թե՛ օրենսդրական գործունեության ընթացքում:

Վերահաստատելով տաքսի ծառայություն մատուցողների խնդիրների եւ հոգսերի նկատմամբ մտահոգությունը՝ նախարարությունը կոչ է անում.

1. լիգայի նախագահին. մերկապարանոց հայտարարությունների փոխարեն հանդես գալ օրենսդրության սահմաններում տեղավորվող հստակ առաջարկներով եւ չանցնել կոռեկտության սահմանները,

2. տաքսի ծառայություն մատուցել պատրաստվող անձանց. նախարարության հետ իրավահարաբերություններում կտրականապես ձեռնպահ մնալ միջնորդավորված (լիազորագրով) ծառայություններից, լիարժեք օգտվել նախարարության վարչական շենքի առաջին հարկում գործող «Մեկ պատուհանից»:

Անհրաժեշտության դեպքում անձամբ՝ առանց միջնորդի կարող եք կապ հաստատել նախարարությունում  գործող  «թեժ գծի» եւ տեղեկատու հեռախոսահամարներով՝ անհրաժեշտ խորհրդատվություն եւ պարզաբանումներ ստանալու համար»,-ասված է հայտարարության մեջ: