Համաշխարհային բանկը Հայաստանում այս տարի 2,7 տոկոս տնտեսական աճ է կանխատեսում, 2018-ին՝ 3,1 տոկոս

Համաշխարհային բանկի կանխատեսումներով, Հայաստանը 2017 թվականին կգրանցի 2,7 տոկոս տնտեսական աճ: Այս մասին ասված է «Գլոբալ տնտեսության հեռանկարներ» անվանումով զեկույցում:

Ըստ զեկույցի տվյալների՝ Հայաստանում 2018 թվականին տնտեսական աճը կկազմի 3,1 տոկոս, իսկ 2019-ին՝ 3,4 տոկոս, մինչդեռ 2016 թվականին տնտեսական աճը եղել է 0,2 տոկոս:

Ադրբեջանը, զեկույցի համաձայն, այս տարի կգրանցի 1,4 տոկոս անկում, 2018-ին՝ 0,6 տոկոսի աճ, իսկ 2019-ին՝ 1,3 տոկոսի աճ:

Փոխարենը Վրաստանի ՀՆԱ-ն 2017-ին կունենա 3,5 տոկոսի աճ, 2018-ին՝ 4 տոկոսի աճ, իսկ 2019-ին՝ 4,5 տոկոսի աճ:

Ինչ վերաբերում է մեր ռազմավարական գործընկեր Ռուսաստանին, ապա Համաշխարհային բանկը կանխատեսում է, որ 2017 թվականին տնտեսական աճը կկազմի 1,3 տոկոս, իսկ 2018-ին եւ 2019-ին՝ 1,4-ական տոկոս:

Թուրքիայում 2017 թվականին կանխատեսվում է 3,5 տոկոսի, 2018 թվականին՝ 3,9 տոկոսի, իսկ 2019-ին՝ 4,1 տոկոսի տնտեսական աճ:

Ընդհանուր առմամբ, Համաշխարհային բանկը (ՀԲ) ընթացիկ տարում համաշխարհային տնտեսության աճի կանխատեսումը հունվարի գնահատականների համեմատությամբ, թողել է նույն 2,7 տոկոսի մակարդակի վրա: «ՀԲ¬-ն կանխատեսում է, որ 2017 թվականին համաշխարհային տնտեսության աճը կամրապնդվի մինչեւ 2,7 տոկոս: Արտադրության եւ առեւտրի ծավալների ավելացումը, շուկայում աճող վստահությունը եւ հումքի գների կայունացումը թույլ կտան վերականգնել տնտեսական աճը հումք արտահանող եւ զարգացող երկրներում»,-¬նշվում է փաստաթղթում:

Դրա հեղինակները նշում են, որ զարգացած տնտեսությամբ պետությունների աճը, որոնց մեջ մտնում են ԱՄՆ-¬ը, եվրոգոտու երկրները եւ Ճապոնիան, ինչպես սպասվում է, ընթացիկ տարում կբարձրանա մինչեւ 1,9 տոկոս, ինչը «նաեւ օգուտ կբերի այդ պետությունների առեւտրական գործընկերներին»:

Այսպես, Եվրոպայում եւ Կենտրոնական Ասիայում 2017 թվականին տնտեսական աճի արագացում է կանխատեսվում մինչեւ 2,5 տոկոս եւ մինչեւ 2,7 տոկոս՝ 2018 թվականին, ինչին նպաստելու են հումք արտահանող երկրների տնտեսության վերականգնման շարունակումը, ինչպես նաեւ աշխարհաքաղաքական ռիսկերի եւ ներքաղաքական անորոշությունների նվազումը տարածաշրջանի խոշոր պետություններում»: