Ինչպիսի եղանակ է սպասվում ամռան ամիսներին. Գագիկ Սուրենյանի կանխատեսումները

Այս տարի հունիս ամսին հանրապետությունում օդի ջերմաստիճանը և տեղումների քանակը կանխատեսվում է նորմայի սահմաններում: Այս մասին լրագրողների հետ հանդիպման ժամանակ հայտնեց ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը:

Նրա խոսքով՝ Արարատի, Արմավիրի մարզերում, Արագածոտնի, Կոտայքի և Վայոց ձորի նախալեռներում առանձին օրերին ցուրտ օդային հոսանքների ներխուժման արդյունքում գիշերային ժամերին ջերմաստիճանը կիջնի +7 +12 աստիճանի, իսկ ցերեկային ժամերին կհասնի +33 +36 աստիճանի:

"Շիրակում, Գեղարքունիքի, Արագածոտնի և Վայոց ձորի լեռնային շրջաններում առանձին օրերին գիշերը ջերմաստիճանը կիջնի +2+5, իսկ ցերեկային ժամերին՝ +24+28: Լոռու մարզում նվազագույն ջերմաստիճանը կանխատեսվում է +3+6, ցերեկային ժամերին՝ +25 +30: Տավուշում գրեթե նույն ջերմային ֆոնը կդիտվի: Ինչ վերաբերում է Սյունքի մարզին, ապա հովտային շրջաններում գիշերը կդիտվի +10+ 15 ցերեկային ժամերին ջերմասգտիճանը կհասնի +33+37 աստիճանի: Երևանում հունիսի հատկապես առաջին տասնօրյակում գիշերային ժամերին ջերմաստիճանը կարող է նվազել +7+10, իսկ արդեն երկրորդ տասնօրյակում՝ ցերեկը կդիտվի +34 +36 աստիճանի",- ասաց Գագիկ Սուրենյանը:

Նրա խոսքով՝ տեղումների քանակը հունիսին կլինի նորմայի սահմաններում, իսկ հուլիսին ու օգոստոսին ջերմաստիճանը նորմայից բավական բարձր կլինի:

Սուրենյանը նշեց, որ այս տարի արևադարձային ջերմային ցիկլոնի ակտիվացման ցիկլն է, իսկ այս գործընթացը ձևավորվում է Արաբական թերակղզու վրա և այն ապահովում է ՀՀ տարածք արաբական անապատներից արևադարձային տաք օդային հոսանքների ներթափանցում:

"Քանի որ այս տարի ջերմային ցիլկոնի ակտիվացման ցիկլն է, հուլիս-օգոստոս ամիսներին օդի ամսական միջին ջերմաստիճանը կլինի նորմայից բարձր: Առանձին օրերին Արարտյան դաշտում, Տավուշի հովտային շրջաններում և Երևանում կդիտվի +40 աստիճան, Մեղրիում, Կապանում և Ագարակաում՝ մինչև +41+42 աստիճան տաքություն",- ասաց Սուրենյանը: