Եթե մեր բոլոր հաստափորները մուծեն այնքան հարկ, որքան որ պարտավոր են, նույնիսկ կկարողանանք աստիճանաբար նվազեցնել մեր արտաքին պարտքը

Խոսենք կոնկրետ օրինակներով։ Ոչ մեկի համար գաղտնիք չէ, որ նույն Լֆիկը, կամ էլ Ծառուկյանը եթե ոչ միլիարդատեր են, ապա հասատատ մուլտիմիլիոնատեր են ու ունեն առնվազն մի քանի հարյուր միլիոն դոլարի կապիտալներ սեփականատեր են, մինչդեռ իրենց հաշվետվություններում նշել են մի քանի տասնյակ միլիոնի բան։ Հետևաբար, կոնկրետ նրանց րինակով տեսնում ենք, որ մեծահարուստները իրենց ունեցվածքի առյուծի բաժինը պահում են չհարկվող ստվերում, ինչի արդյունքում ոչ միայն հսկայական գերշահույթներ են ունենում, այլև բյուջեն չի ստանում բավարար քանակությամբ եկամուտ ու ՊԵԿ-ը տեռռորի է ենթարկում փոքր բիզնեսը՝ մեծ բիզնեսի շնաձկների չվճարած գումարները լրացնելու նպատակով։

Սա իր հերթին ծնում է ոչ թե զուտ ֆինանսա-տնտեսական խնդիր, այլ սոցիալական անարդարություն ու ժողովրդի վստահությունն առ իշխանություն էլ ավելի է նվազում և ձևավորվում է էլ ավելի սուր հակակրանք՝ տնտեսա-քաղաքական վերնախավի հանդեպ։

Հավաստիացնում եմ, եթե մեր բոլոր հաստափորները մուծեն այնքան հարկ, որքան որ պարտավոր են, մեր պետության եկամուտները մի գլուխ բարձր կլինեն, ինչը իր հերթին առողջացնող արդյունք կունենա տնտեսության վրա ու նույնիսկ կկարողանանք աստիճանաբար նվազեցնել մեր արտաքին պարտքը, որն արդեն աստղաբաշխական բարձրունքների է հասել։