Ամբաստանյալի կինը չհարցաքննվեց. Սարի թաղի գործով նիստը հետաձգվեց

Սարի թաղում 2016թ. հուլիսի 19-ի դեպքերով հարուցված քրեական գործի շրջանակում կալանավորված Սարի թաղի 10 բնակիչների գործով դատական նիստն այսօր` մայիսի 23-ին, Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանը հետաձգեց: Վկա ոստիկաններին հարցաքննելուց հետո դատարանը ընդմիջում հայտարարեց, որից հետո պետք է հարցաքննվեր ամբաստանյալներից Էդուարդ Զեյթունյանի կինը՝ Լալա Բերնեցյանը, սակայն, դատական նիստը հետաձգել է:

«Պետք է այսօր ես ցուցմունք տայի, բայց ընդմիջումից հետո դատավորն եկավ ու հետաձգեց նիստը, բայց ոչ մի բան չասաց, թե ինչու»,-NEWS.am-ի հետ զրույցում ասաց Լալա Բերնեցյանը:

Հիշեցնենք, որ ըստ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն ու Էդուարդ Զեյթունյանը 2016թ․ հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ: Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են: Կալանավորվածների հարազատները մինչդեռ պնդում են՝ նրանք ընդամենը պահանջել են, որ իրենց հոսանքն ու ջուրը միացնեն, բացեն փակ ճանապարհները: