«Ոչ, ոչ, ոչ…». Բորբոքված նաիրիտցիները ընդհանուր հայտարարի չեն գալիս

Արման Ալավերդյանը ֆեյսբուքյան իր էջում գրում է .

Նաիրիտցիների աշխատավարձերի վճարման գործընթացը մեկնարկել է, բայց աշխատակիցները կրկին կառավարության շենքի դիմաց են: Ավելի վաղ նրանք հայտարարել էին, որ հուլիսի 16-ին՝ այսօր, ցույց կանցկացնեն, եթե պարտքերի մարման վերաբերյալ խոստումը չկատարվի:

Նաիրիտի աշխատակիցների պարտքերը պետք է մարվեն փուլերով, ինչը դժգոհության հիմնական պատճառն է: Բողոքի ակցիա իրականացնող նաիրիտցիները պահանջում են բոլորի աշխատավարձը միանգամից վճարել: Կառավարության այսօրվա նիստի ընթացքում հարցին անդրադարձել է վարչապետը. «Ում թղթերը պատրաստ են, և չունի դժգոհություն, կարող է իր գումարը ստանալ»,- ասել է Հովիկ Աբրահամյանը: Ապա Էներգետիկայի և բնական պաշարների նախարար Երվանդ Զախարյանը նշել է մի քանի խնդիր, որոնք խոչընդոտում են այս պահին աշխատավարձի պարտքը միանգամից մարելուն: Նախ՝ կան աշխատակիցներ, որոնք դժգոհում են, թե իրենց աշխատավարձը սխալ է հաշվարկվել, ոմանք աշխատավարձերի ուշացման համար նաև տուգանքներ են պահանջում: Այսպիսով, կան մի շարք խնդիրներ, որոնք ազդում են գործընթացի վրա:

Նաիրիտցիները, սակայն, այս ամենի մեջ պառակտման վտանգ են տեսնում: Կառավարության մոտ այսօր ցուցարարներից մեկը, օրինակ, կարծում է, որ եթե մի մասը աշխատավարձ ստանա, ապա հետագայում չի միանա այն աշխատակիցների բողոքին, որոնց պարտքի մարումն ինչ-ինչ պատճառներով ուշանում է: Նրանք անգամ հայտարարություններ են անում, թե նա, ով կստորագրի փաստաթուղթը, կհամարվի դավաճան: 
Կառավարությունից խոստանում են աշխատավարձերի պարտքերի մարման գործընթացն ավարտին հասցնել 10-15 օրերի ընթացքում: Կառավարությունն առաջարկում է երկու տարբերակ. սկզբում վճարել այն աշխատակիցների պարտքը, ովքեր հաշվարկների հետ համաձայն են ու որևէ խնդիր չունեն, կամ բոլորը միասին պետք է սպասեն 10-15 օր ու ստանան իրենց աշխատավարձը: «Նաիրիտ» գործարանի նախկին աշխատակիցների կարծիքը տարբեր է:

Նաիրիտցիները մի մասը բորբոքված է ու չի ցանկանում քննարկել կառավարության առաջարկած տարբերակները, նրանք շարունակ պնդում են, որ աշխատավարձը բոլորը պետք է ստանան միանգամից ու այլևս չեն ցանկանում սպասել: «Նաիրիտ»-ի արհմիության նախագահ Հրաչ Թադևոսյանը, ով փորձում էր հանգստացնել բարկացած գործընկերներին, այսօրվա ցույցի ընթացքում առաջարկեց համաձայնել պարտքերի մարման փուլային տարբերակին, կամ սպասել: Նրա առաջարկին՝ ուզո՞ւմ եք բոլորդ միասին ստանաք, հնչեց դրական պատասխան, սակայն նաիրիտցիները չհամաձայնեցին սպասել 10-15 օր:

Երկար ժամանակ պարտքի մարմանը սպասող քաղաքացիները բորբոքված են, ինչն էլ խանգարում է նրանց որոշում կայացնել ու ևս մեկ քայլով մոտենալ հարցի վերջնական լուծմանը: