Ո՞վ սպանեց Չուգունին. հարեւանները մանրամասներ են պատմում

Armtimes.com-ը գրում է.

Քրեական հեղինակություն, քանաքեռցի 35-ամյա Արթուր Հովհաննիսյանի (հայտնի է Չուգուն մականունով) սպանության դեպքի առթիվ հարուցված քրեական գործի շրջանակներում դեռեւս ձերբակալված անձ չկա: Այս մասին երեկ մեր զրույցում ասաց ՀՀ քննչական կոմիտեի մամուլի խոսնակ Սոնա Տռուզյանը:

Արթուր Հովհաննիսյանը սպանվել է հուլիսի 14-ին՝ ժամը 14:30-ի սահմաններում: Ըստ պաշտոնական հաղորդագրության, Տիգրանյան 5 հասցեում հնչել են կրակոցներ. պարզվել է, որ թիվ 5 շենքի դիմաց հրազենից կրակոցներ են արձակվել նույն հասցեի բնակիչ, 35-ամյա Արթուր Հովհաննիսյանի ուղղությամբ՝ պատճառելով կյանքի հետ անհամատեղելի վնասվածքներ (Հովհաննիսյանը սպանվել է գլխին ստացած հրազենային վնասվածքից,-հեղ.)։ Նախնական տվյալներով, կրակոցներն արձակվել են, երբ Հովհաննիսյանը, դուրս գալով շենքի մուտքից, գնացել է դեպի հարեւանությամբ կայանված իր ավտոմեքենան։ Դեպքի վայրի զննությամբ հայտնաբերվել է 5 պարկուճ, 1 գնդակ։ Առայժմ հայտնի չէ, թե ինչ հրազենից են արձակվել կրակոցները: Մեր տեղեկություններով, դրանք արձակվել են մեկ անձի կողմից: Կրակոցների պահին սպանվածի կնոջ եղբայրը եղել է հենց Արթուրի մեքենայի մեջ եւ ամենայն հավանականությամբ՝ տեսել է, թե ով է կրակել իր փեսայի ուղղությամբ: 

Քանաքեռցի Չուգունի հարեւանները երեկ դժվարացան պատասխանել մեր հարցին, թե ի՞նչը կարող էր դառնալ սպանության շարժառիթը: Արթուր Հովհաննիսյանը ամուսնացած էր, ուներ մեկ որդի՝ 4 տարեկան: Նրա հարեւանուհիներից մեկը երեկ մեր զրույցում հերքեց մամուլում շրջանառվող այն տեղեկությունները, թե Հովհաննիսյանը սպանվել է կնոջ եւ երեխայի աչքի առաջ: «Իրենք հենց առաջին հարկում են ապրում: Արթուրի կինը կրակոցների ձայնը լսելուց հետո վազել է դուրս, բայց նույնիսկ չեն թողել, որպեսզի մոտենա ամուսնուն, որպեսզի չտեսնի էդ վիճակում: Բոլորը այդ ձայներից դուրս վազեցին, ծնողները դուրս եկան, տեսան՝ որդին արյունաշաղախ պառկած է: Ինչ ասեմ՝ սադիստներ են եղել: Նա շատ ուժեղ մարդ էր, շատերին էր օգնում, սիրող ամուսին էր, լավ եղբայր: Սադիստ է եղել անողը, չգիտեմ ինչից կարող էր նման բան լինել: Միայն կարծում եմ, որ վարձու մարդասպան է եղել, շատ պրոֆեսիոնալ է գործել ու փախել: Քննիչն ասում էր՝ այսօր մինչեւ իրիկուն սպանողին կհայտնաբերեն, սա որերորդ դարն է, որ չբացահայտեն, տեսնենք ինչ կանեն»,- պատմեց սպանվածի հարեւանուհին: Վերջինս մեր զրույցում ասաց, որ Արթուրը դրսում բիզնեսներ ուներ, գնում-գալիս էր. «Բոլորս շոկի մեջ ենք, չգիտենք ինչ եղավ: Սպանվածի կնոջ եղբոր աչքի առաջ է եղել դեպքը, նա հիմա շոկի մեջ է, չի հասկանում՝ ինչ է կատարվել, սա իր վրա շատ վատ կանդրադառնա»,- ասաց բնակչուհին:

Մեր տեղեկություններով, քրեական գործի շրջանակներում հարցաքննվել է նաեւ Չուգունի կնոջ եղբայրը:

Նշենք, որ դեպքի առթիվ Քանաքեռ-Զեյթուն վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի (դիտավորյալ սպանություն,  պատժվում է ազատազրկմամբ՝ ութից տասնհինգ տարի ժամկետով) եւ 235-րդ հոդվածի 1-ին մասի (ապօրինի զենք պահելը, կրելը՝ պատժվում է ազատազրկմամբ առավելագույնը երեք տարի ժամկետով) հատկանիշներով։ Մեր հարցին, թե ի՞նչ վարկածներ է այժմ քննում նախաքննական մարմինը, ՀՀ քննչական կոմիտեի մամուլի խոսնակ Սոնա Տռուզյանը պատասխանեց, որ մշակվել են մի քանի աշխատանքային վարկածներ, ձեռնարկվում են անհրաժեշտ քննչական եւ դատավարական գործողություններ՝ հանցագործությունը բացահայտելու ուղղությամբ։

Երեկ տեղեկացրել էինք, որ ԲՀԿ խմբակցության պատգամավոր Աբրահամ Մանուկյանը հերքում է մամուլում տարածված տեղեկությունները, թե Չուգունին կարող է սպանած լինել իր որդին:

Մանուկյանը երեկ ասել էր, որ Չուգունը իր սանիկն է եւ չի կարող նման բան լինել: