Գավառցի ծնողներն այցելեցին Արցախում ծառայող իրենց զինվոր զավակներին

«Գեղարեգ» կրթամշակութային հասարակական կազմակերպության նախաձեռնությամբ եւ ՀՀ պաշտպանության նախարարության օժանդակությամբ Գեղարքունիքի մարզի Գավառ քաղաքի, Սարուխան, Ծաղկաշեն, Կարմիրգյուղ համայնքների 17 զինծառայողների ծնողներ այցելեցին Արցախի զորամասեր՝ տեսակցելու իրենց զինվոր զավակներին: Ինչպես տեղեկացրեց նախաձեռնության հեղինակ «Գեղարեգ» ՀԿ ներկայացուցիչ Գրիգոր Դաշտոյանը, Արցախ տանող ճանապարհից առաջ ծնողները ստացել են Գեղարքունյաց թեմի Գավառի տարածաշրջանի Տեր Ներսես քահանա Սահակյանի օրհնությունը: «Սուրբ գործ է հայրենիքի պաշտպանությունը, եւ բոլորիս աղոթքներն առաջին հերթին պետք է ուղղված լինեն մեր սահմանները պահող զինվորների սթափության եւ զգոնության համար», - այս խոսքերով զինծառայող որդիներին տեսակցության մեկնող ծնողներին դիմեց Տեր Ներսես քահանա Սահակյանը: «Ծնողները միասնական աղոթք բարձրացրին առ Աստված, մոմեր վառեցին հայրենիքի պաշտպանների համար եւ ճանապարհ ընկան: Լուսադեմին ծնողներն արդեն զորամասի մոտ էին: Մոտալուտ հանդիպման սպասումից չքացել էր անգամ հոգնածությունը: Ժամեր անց նրանց որդիները ստացան իրենց ծնողներին տեսակցելու թույլտվությունը եւ կայացավ երկար սպասված հանդիպումը: Երջանկությունից բխող արցունքերը միախառնվել էին զինվոր որդի ունենալու հպարտությանը»,-պատմեց Գրիգոր Դաշտոյանը:

Շատ ծնողներ ավելի քան կես տարի հնարավորություն չէին ունեցել տեսնելու իրենց որդիներին: Սահմանամերձ զորամաս այցելելու առաջարկությունն արել էին զինծառայողների ծնողները «Գեղարեգ» ԿՄՀԿ-ի կողմից իրականացվող «Ես էլ եմ զինվոր» ծրագրի շրջանակներում տեղի ունեցած հանդիպման ժամանակ: Ապա սկսվեց խոսք ու զրույցը բանակային առօրյայի, զինվորական ծառայության անհրաժեշտության եւ հոգեբանական ու ֆիզիկական փոփոխությունների մասին, որ ծառայության ընթացքում նկատվում են տղաների մոտ: Զինծառայողները հպարտությամբ իրենց ծնողների առաջ նշեցին, որ գոհ են ծառայությունից, հրամանատարության վերաբերմունքից, որ իրենց համար հպարտություն է՝ կրել զինվորի պատվավոր կոչումն ու զինվորական համազգեստը, ապրել զինվորական առօրյայով եւ այն զգացողությամբ, որ կարողանում են ապահովել մի ամբողջ ժողովրդի խաղաղություն: «Մենք որ մեր սահմանը չպահենք, ո՞վ մեր փոխարեն այն կպահի: Տղամարդը կյանքում կոփվում է հենց բանակում, եւ մենք մեզ հզոր ու առնական ենք զգում»,-խոստովանեցին Գեղարքունիքի մարզի զինծառայողները:

ՀՀ Պաշտպանության նախարարությունից եւ «Գեղարեգ» ՀԿ-ից իրենց շնորհակալությունը հայտնեցին նաեւ զինծառայողների ծնողները՝ նման նախաձեռնության եւ աջակցության համար: Գրիգոր Դաշտոյանը զինծառայողների եւ ծնողների հանդիպման կազմակերպումը համարեց բանակ-հասարակություն կապի ամրապնդման եւ բանակի նկատմամբ վստահության բարձրացման կարեւոր բաղադրիչ:

«Ես էլ եմ զինվոր» ծրագիրը շարունակում է անդրադառնալ զինվորական առօրյային` ծրագրի մասնակից երեխաների եւ պատանիների համար կազմակերպելով այցելություններ դեպի սահմանամերձ զորամասեր: Ռազմահայրենասիրական դաստիարակությանը նպաստող այս ծրագիրն իրականացվում է Հայաստանի երիտասարդական հիմնադրամի` որպես ՀՀ Նախագահի կողմից ընտրված գործընկեր կազմակերպության կողմից իրականացվող դրամաշնորհային մրցույթի շրջանակներում:

Խոսրով Խլղաթյան