Երեւանի բնակչին մեղադրանք է առաջադրվել՝ կնոջն ինքնասպանության հասցնելու համար

ՀՀ քննչական կոմիտեի Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում ձեռնարկված քննչական գործողութունների արդյունքում պարզվում են Երեւանի 30-ամյա բնակչուհու մահվան հանգամանքները. կնոջն ինքնասպանության հասցնելու համար մեղադրանք է առաջադրվել ամուսնուն։

Նախնական տվյալներով՝ Երեւանի բնակչուհին՝ 1986թ. ծնված կինը, ինքնասպանություն գործելու նպատակով, 2017 թվականի մարտի 3-ին նետվել է տան երկրորդ հարկից նկուղային հարկ, որի հետեւանքով ստացած վնասվածքներից, առանց գիտակցության գալու, մարտի 7-ին բժշկական կենտրոնում մահացել է:

Դեպքի առթիվ ՀՀ ՔԿ Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի հատկանիշներով, եւ ձեռնարկվել անհրաժեշտ քննչական եւ դատավարական այլ գործողություններ՝ կնոջ ինքնասպանություն գործելու պատճառները պարզելու համար։

Քննությամբ փաստական տվյալներ են ձեռք բերվել, որ  կինը նշված տանն ապրել է ամուսնու հետ, եւ համատեղ կյանքի ընթացքում տարբեր կենցաղային հարցերի շուրջ ունեցել են վիճաբանություններ։ Դեպքի օրը եւս ամուսինները վիճաբանել են, որի ընթացքում ամուսինը բռնություն է գործադրել կնոջ նկատմամբ, վիրավորական արտահայտություններ հնչեցրել, ինչից որոշ ժամանակ անց կինը, բարձրանալով տան 2-րդ հարկ, նետվել է ներքեւ։

Ձեռք բերված ապացույցների հիման վրա՝ ամուսնուն մեղադրանք է առաջադրվել՝ ՀՀ քրեական օրենսգրքի 110-րդ հոդվածի 1-ին մասով (Սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը):

Նախաքննությունը շարունակվում է: Կատարվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ եւ լրիվ հետազոտումն ապահովելու ուղղությամբ, նշանակվել են փորձաքննություններ։