Գորիկ Հակոբյանն լյուստրացիայի ենթարկեց ՀՀ իշխանություններին

Արման Գրիգորյանը ֆեյսբուքյան իր էջում գրում է .

Երևի քսանհինգ տարվա մեջ առաջին անգամ Հայաստանում իշխանություն-ժողովուրդ հարաբերությունների որակի մասին ամենաճիշտ խոսքն ասվել է այսօր կառավարության նիստին ու հնչեցվել է ՀՀ ԱԱԾ տնօրեն Գորիկ Հակոբյանի կողմից: Վերջինս ի պատասխան նաիրիտցիների խնդրի շուրջ Հովիկ Աբրահամյան-Երվանդ Զախարյան երկխոսության, ինչպես ԳԱԼԱ-ն է գրում, ասել է բառացիորեն հետևյալը.«Երեկվա հավաքին հինգ հարյուր մարդ կար գործարանի մոտ, միակ առաջարկն այն է, որ ուզում են փողը ստանան միանգամից, բոլորով, ինչի՞ համար, որովհետեւ մտածում են, որ դուք կվճարեք երկու հարյուր հոգու եւ փողը կվերջանա, չկա վստահություն մեր իշխանությունների նկատմամբ: Ասում են՝ կհասնեք քսանհինգին եւ փողը կվերջանա: Ո՞վ կարող է ասել, որ բոլորը կստանան, պետք է տալ «գարանտիա», որ մինչեւ ամսի վերջ բոլորը կստանան»:

Այն որ սա բացառիկ դեպք է, ինքնին հասկանում են բոլորը, քանի որ, ինչպես նույն աղբյուրն է նշում, Գ. Հակոբյանը գործադիրի նիստում կարծիք կամ առաջարկություն երբեք չի ներկայացրել կամ հայտնել: Սակայն միայն սրանով չի ավարտվում այս բացառիկությունը: Բանն այն է, որ պետանվտանգության համար պատասխանատու կառույցներից մեկի ղեկավարը հայտնում է իրական թվեր ցուցարարների մասին նշելով երեկվա հավաքի թիվը` հինգ հարյուր մարդ: Եվ ապա, առանց քաշվելու ու այլևայլությունների արձանագրում է մի փաստ, որ բոլորը գիտեն, սակայն ոչ մեկը չի բարձրաձայնել այն էլ այս կարգի բաց տեքստով ու անկեղծությամբ` հասարակությունը չի վստահում իր իշխանություններին ու պահանջում է երաշխիքներ, որ խաբված, կամ ավելի ճիշտ հերթական անգամ "քցված" չի լինի:

Ինչ կարող է սա նշանակել. այն որ պարոն Հակոբյանն ուղղակի ազնվության ու անկեղծության պոռթկում է ունեցել կառավարության նիստին, թե այս ամենի խորքային ենթատեքստն ու շերտերն ավելին են, քան կարելի է ենթադրել: Եթե անկեղծորեն արձանագրենք, այս խոսքով պարոն գեներալ-գնդապետը պարզեիպարզ ցույց է տվել այն իրականությունը, որ կա Հայաստանում արդեն տարիներ ի վեր. այն է` ոչ օրինական իշխանությունների գոյությունը, քանի որ միայն անօրինական ճանապարգով իշխանության եկած վարչակազմն է, որ վստահություն չի վայելում հասարակության մոտ ու միայն այս դեպքում է, որ հասարակությունն իր տարրական պահանջների բավարարման համար պահանջով հանդես գալիս նաև պահանջում է լրացուցիչ երաշխիքներ: Այսքանից հետո, այլևս անիմաստ է խոսել նաև այն մասին, թե Հայաստանում լյուստրացիա գոյություն չունի: Գորիկ Հակոբյանը դե ֆակտո լյուստրացիայի ենթարկեց ներկայիս իշխանություններին ու ցույց տվեց նրանց իրական դեմքը` իրերն իրենց անուններով կոչելով: