Երբևէ իմ պատճառով վթարներ չեն եղել. Դիանա Մալենկոն՝ երեկ վթարի ենթարկվելու մասին

 

Lfe.panorama.am-ը գրում է . 

 

Ինչպես արդեն հայտնի է՝ երեկ երեկոյան դերասանուհի, հաղորդավարուհի Դիանա Մալենկոն Սարյան փողոցում վթարի է ենթարկվել: Ըստ ականատեսների՝ վթարի մեղավորը եղել է Դիանա Մալենկոյի վարած Nissan March մակնիշի ավտոմեքենայի հետեւից եկող մեքենայի վարորդը, որը հարվածել է Դիանայի մեքենային, սակայն իրականում մեղավորը առջեւից ընթացող մեքենայի վարորդն է եղել:

 

Life.panoarama.am-ը կապ հաստատեց Դիանայի հետ՝ պարզելու, թե ինչ հանգամանքներում է կատարվել վթարը եւ արդյոք վիրավորներ չկան դրա հետեւանքով:

 

«Շնորհակալ եմ բոլորին անհանգստանալու համար: Լուրջ վնասվածքներ չկան, ուժեղ հարվածի պատճառով քիթս դիպավ ղեկին, բայց, բարեբախտաբար, ուղղակի ուժեղ ցավեցրել եմ, կոտրվածքներ չկան: Ուրախ եմ նաեւ, որ մյուս վարորդները եւս վնասվածքներ չեն կրել»,- նշեց Դիանա Մալենկոն:

Խոսելով վթարի պատճառների մասին՝ դերասնուհին հստակեցրեց.

 

«Իրականում մեղավորն իմ դիմացի մեքենան էր: Վարորդը կանգնած տեղից ուժեղ արագություն հավաքեց ու անմիջապես արգելակեց, ես էլ, բնականաբար, նույնպես արգելակեցի, որի պատճառով էլ հետեւից եկող մեքենան չհասցրեց արգելակել ու հարվածեց իմ մեքենային: Առաջին մեքենայի պատճառով հիմնականում տուժեց հետեւից եկող մեքենան, որի վարորդը շատ բարեխղճորեն իջավ, մոտեցավ ինձ, իսկ դիմացի մեքենայի վարորդը, ով այդ դեպքի մեղավորն էր, պարզապես հեռացավ»:

Դիանա Մալենկոյի մեքենան վնասներ չի կրել, փոխարենը հետեւից հարվածող մեքենան է ուժեղ հարվածի պատճառով վնասվել:

 

Հաղորդավարուհին նկատեց, որ վթարի պատճառով վախն արդեն հետեւում է, նա վստահեցրեց, որ իրականում օրինապահ վարորդ է.

«Արդեն երեք տարուց ավել է, ինչ վարում եմ, երբեւէ իմ պատճառով վթարներ չեն եղել: Հստակ կարող եմ ասել, որ օրինապահ վարորդ եմ, արագություն էլ չեմ սիրում, որը հենց հաճախ դառնում է վթարների պատճառ»,- ավարտեց մեր զրուցակիցը:

 

Հեղինակ՝ Անուշիկ Մելքոնյան