Վեցերորդ գումարման ԱԺ-ն սկսեց իր աշխատանքը . Կառավարությունը վայր է դնում լիազորությունները (ուղիղ)

Այսօր՝ մայիսի 18-ին, մեկնարկեց նորընտիր Ազգային ժողովի անդրանիկ նիստը, որը վարում է տարիքով ամենատարեց պատգամավորը՝ ՀՀԿ ցուցակով ընտրված ազգային փոքրամասնության ներկայացուցիչ Կնյազ Հասանովը: Առաջին նստաշրջանի բացման առթիվ ողջույնի խոսքով հանդես կգան ՀՀ նախագահը եւ Ամենայն Հայոց Կաթողիկոսը:

Նրանց ելույթներից հետո 6-րդ գումարման ԱԺ-ի պատգամավորները կերդվեն. «Հանուն համազգային նպատակների իրականացման եւ հայրենիքի հզորացման ու բարգավաճման` երդվում եմ բարեխղճորեն կատարել ժողովրդի առջեւ ունեցած պարտավորություններս, պահպանել ՀՀ Սահմանադրությունը եւ օրենքները, նպաստել ՀՀ ինքնիշխանության եւ շահերի պահպանմանը, անել ամեն ինչ քաղաքացիական համերաշխության, ազգային ու համամարդկային արժեքների պահպանման համար»:

Խորհրդարանի առաջին նիստում փակ գաղտնի քվեարկությամբ կըտրվեն Ազգային ժողովի նախագահը, փոխնախագահները, մշտական հանձնաժողովների նախագահները: Նոր ԱԺ-ում ի տարբերություն նախորդի, մեկով ավելանալու է ԱԺ փոխնախագահների թիվը, եւ առաջին անգամ նրանցից մեկը ընդդիմադիր խմբակցության ներկայացուցիչ է լինելու:

Հիշեցնենք, որ ԱԺ առաջին նիստում կառավարությունը վայր է դնում իր լիազորությունները, որից հետո 10 օրվա ընթացքում ՀՀ նախագահը նշանակում է նոր վարչապետ: Վարչապետի նշանակումից հետո 20 օրվա ընթացքում նշանակվում են կառավարության անդամները, եւս 20 օրվա ընթացքում հաստատվում է կառավարության ծրագիրը:

Նշենք, որ նոր խորհրդարանն ունի 105 պատգամավոր, որտեղ  գործելու է 4 խմբակցություն՝ ՀՀԿ, «Ծառուկյան» դաշինք, «Ելք» դաշինք եւ ՀՅԴ:

Նախօրեին կայացած ՀՀԿ խորհրդի նիստից հետո ՀՀԿ խոսնակ Էդուարդ Շարմազանովը նշել է, որ ԱԺ նախագահի պաշտոնում իրենք առաջադրելու են Արա Բաբլոյանի թեկնածությունը, իսկ ԱԺ փոխնախագահների պաշտոններում՝ Արփինե Հովհաննիսյանի եւ Էդուարդ Շարմազանովի թեկնածությունները: ՀՀԿ խմբակցությունը կշարունակի ղեկավարել Վահրամ Բաղդասարյանը, քարտուղարը կլինի Գագիկ Մելիքյանը։

ՀՀԿ-ն նաեւ առաջարկելու է այժմ գործող 12 մշտական հանձնաժողովները կրճատել եւ դարձնել 9-ը։ Հանրապետականին այդ դեպքում բաժին կհասնի վեց հանձնաժողով։ Ֆինանասաբյուջետային հանձնաժողովը կգլխավորի Գագիկ Մինասյանը, արտաքին հարաբերությունների հանձնաժողովը՝ Արմեն Աշոտյանը, տնտեսական հարցերի հանձնաժողովը՝ Խոսրով Հարությունյանը, պետաիրավական հարցերի հանձնաժողովը՝ Հրայր Թովմասյանը, Ներքին գործերի եւ պաշտպանության հանձնաժողովը՝ Կորյուն Նահապետյանը, առողջապահության եւ սոցիալական հարցերի հանձնաժողովը՝ Հակոբ Հակոբյանը։

Նախօրեին «Ծառուկյան» դաշինքի խմբակցության նիստում որոշվել է, որ իրենց կողմից ԱԺ փոխնախագահ կառաջադրեն Միքայել Մելքումյանին: Խմբակցությունը կղեկավարի Գագիկ Ծառուկյանը: Իսկ երեք հանձնաժողովների նախագահներ կլինեն Նաիրա Զոհրաբյանը, վարդան Բոստանջյանն ու Վարդեւան Գրիգորյանը:

«Ելք» դաշինք խմբակցությունը կգլխավորի Նիկոլ Փաշինյանը, քարտուղարը կլինի Գեւորգ Գորգիսյանը: «Ելք»-ը հանձնաժողովի նախագահ չի ունենա:

ՀՅԴ-ն էլ որոշել է, որ իրենց խմբակցությունը կգլխավորի Արմեն Ռուստամյանը, իսկ քարտուղարը կլինի Աղվան Վարդանյանը: