«Ոտքի՛ Հայաստան» նախաձեռնության պայքարը կընթանա երեք փուլով

Այսօր Բաղրամյան պողոտայում հավաքվել էին ժամանակին էլեկտրաէներգիայի դեմ պայքարի դուրս եկած քաղաքացիների մի այլ հատված, որոնց առաջնորդում էր «Բարեւ Երեւան» խմբակցության ավագանու անդամ Դավիթ Սանասարյանը,- հայտնում է Orer.am-ը:

Հանդես գալով «Ոտքի՛ Հայաստան» նախաձեռնության անունից՝ Դ. Սանասարյանը հայտարարեց, որ սա պայքարի սկիզբն է, եւ առաջիկայում նրանք կշարժվեն արդեն իսկ մշակված այլ ռազմավարությամբ:

Պարզվում է, որ նախաձեռնության անդամները որոշել են ոչ միայն փողոցներ փակել եւ իրենց դժգոհությունն արտահայտեն ստեղծված իրավիճակի հետ կապված, այլեւ այցելել մարզեր եւ հանդիպումներ ունենալ տեղի բնակիչների հետ: Ըստ Սանասարյանի՝ իրենց պահանջների հիմքում ընկած է էլեկտրաէներգիայի սակագնի բարձրացման խնդիրը. «Մենք շարունակելու ենք մեր քաղաքացիական անհնազանդությունն այնքան ժամանակ, մինչև որ Հանրային ծառայությունները կարգավորող հանձնաժողովը չեղյալ ճանաչի սակագնի բարձրացման մասին իր ընդունած որոշումը: Եթե մինչև օգոստոսի 1-ը ՀԾԿՀ-ը չընդունի այդ որոշումը, մենք կշարունակենք քաղաքացիական անհնազանդությունն այնքան ժամանակ, մինչև պետությունը չհարուցի քրեական գործեր էներգետիկ ոլորտը փլուզման եզրին հասցրած բոլոր պաշտոնյաների դեմ»:

Նախաձեռնության անդամը նաեւ նշեց. «Եթե պահանջները չկատարվեն, ապա նախաձեռնությունը երեք փուլով է շարունակելու պայքարը. նախ պատրաստվում ենք այցելել Հայաստանում ապրող բոլոր ընտանիքներին և թռուցիկներ բաժանել, հետո տարբեր փողոցներ փակել մայրաքաղաքում և դրանից դուրս, երրորդ փուլով՝ կոչ է արվելու քաղաքացիներին չվճարել կոմունալ վարձերը»։ Թե ե՞րբ է այս ամենը լինելու, դեռ հստակ չէ:

Տեղեկացնենք, որ ըստ նախապես տարածված հայտարարության՝ նախաձեռնության անդամները նամակ հանձնեցին ՀՀԿ գլխավոր գրասենյակ, որն ուղղված է ՀՀ նախագահին: Հետաքրքրականն էլ այն է, որ ցուցարարները ՀՀ նախագահին չեն ընդունում որպես ընտրված նախագահ, սակայն նրան նամակ են ուղարկում:

Տեղեկացնենք, որ պայքարի հետագա քայլերի մասին ցուցարարները կխոսեն ուրբաթ. այդ օրը նախաձեռնությունը պատրաստվում է հանրահավաք անցկացնել Ազատության հրապարակում։

Սոսե Չանդոյան

Աղբյուրը՝ Orer.am