Հովիկ Աբրահամյանի հովանավորությամբ անցկացվեց Ասմունքի հանրապետական մանկապատանեկան 10-րդ մրցույթ-փառատոնը

Ինչպես հայտնում է ORER.am-ը, այսօր՝ մայիսի 11-ին, Հ.Պարոնյանի անվան երաժշտական կոմեդիայի պետական թատրոնում Հովիկ Աբրահամյանի հովանավորությամբ անցկացվեց Ասմունքի հանրապետական մանկապատանեկան 10-րդ մրցույթ-փառատոնը:

Այն նվիրված էր հայ անվանի բանաստեղծներ Մարո Մարգարյանի 100 եւ Սիլվա Կապուտիկյանի 98 ամյակին: Ժյուրիի անդամները ու հյուրերը մեծ ուշադրությամբ և սիրով վայելեցին բեմադրված պարային կատարումները, ազգային ու հայրենասիրական երգերը եւ, իհարկե, ասմունքը:

Մրցույթ-փառատոնին նվերներ ու շնորհակալագրեր հանձնեց Հովիկ Աբրահամյանը:

Կարեւորելով միջոցառման գաղափարը, ինչպես նաեւ շնորհավորելով մրցույթ-փառատոնում հաղթող ճանաչված աշակերտներին՝ իր ելույթում Հ.Աբրահամյանը նշեց.

«Ամեն անգամ մասնակցելով այս միջոցառմանը՝ հասկանում եմ, որ սա հայանպաստ ու ազգանվեր գործ է: Մենք բոլորս միասին պետք է զարգացնենք նմանօրինակ ծրագրերն ու, ինչպես այսօր, քաղենք դրա պտուղները:

21-րդ դարում շատ կարեւոր է հայոց լեզվի, ինչպես նաեւ հայ գրականության պահպանումը»,- ասաց Հ.Աբրահամյանը՝ շեշտադրելով, որ ինքը հպարտանում է հայ գրականությունը սիրող ու հայ մեծանուն գրողների աշխատանքները գնահատող երիտասարդներով:

Նշենք, որ մրցույթին մասնակցել են ՀՀ բոլոր մարզերի, ինչպես նաեւ Արցախի ու Ջավախքի դպրոցականները: Դեռ առաջին փառատոնին մասնակցություն է ունեցել 3000 աշակերտ, իսկ այսօր արդեն նրանց թիվը հասել է 280 հազարի: