Մոսկվայում Հաղթանակի շքերթ է տեղի ունենում

ՌԴ մայրաքաղաք Մոսկվայում մեկնարկել է Մեծ հայրենական պատերազմում հաղթանակի 72-րդ տարեդարձին նվիրված շքերթը։ Դրան կմասնակցեն ավելի քան 10 հազար զինծառայողներ եւ տեխնիկայի 114 միավոր, ինչպես նաեւ 72 ուղղաթիռ ու ինքնաթիռ, հաղորդում է «ՌԻԱ Նովոստի»-ն։

Պրեոբրաժենսկի գնդի նշանակիր խմբերը Կարմիր հրապարակ դուրս կբերեն ՌԴ պետական դրոշն ու Մեծ հայրենական պատերազմում հաղթանակի դրոշը։ Դրանից հետո ՌԴ պաշտպանության նախարար Սերգեյ Շոյգուն կողջունի հրապարակում հավաքված զինծառայողներին։ Ապա Ռուսաստանի նախագահ Վլադիմիր Պուտինը հանդիսավոր ելույթ կունենա, կհնչի ՌԴ հիմնն ու կսկսվի զորքերի հանդիսավոր երթը։

Կարմիր հրապարակով կանցնեն բարձրագույն ռազմական ուսումնական հաստատությունների զինծառայողները։

Ռազմական տեխնիկայի շարասյան շարժը կբացի Т-34-85 տանկը, դրան կհետեւեն «Տիգր- М» զրահամեքենաները՝ «Արբալետ» մարտական մոդուլներով, հակատանկային «Կորնետ-Դ1» հրթիռային համալիրները, «Թայֆուն-M» եւ «Թայֆուն-K» զրահամեքենաները։ Շարասյունը կշարունակեն հետեւակի մարտական մեքենաներ  «Կուրագանեց-25»-ը եւ Հետեւակի մարտական մեքենա-3-ը, Т-72Б3 եւ Т-14 «Արմատա» տանկերը, ինքնագնաց հաուբիցներ «Կոալիցիա-СВ»-ն ու «Մստա-С»-ն, «Իսկանդեր-М» հրիթռային համալիրները, տակտիկական  «Тор-М2У» եւ «Бук -М2» ԶՀՀ-ները, БТР-82а, БТР-МДМ եւ «Բումերանգ» զրահատրանսպորտները, դեսանտի մարտական մեքենաները՝ БМД-4М, զենիթահրթիռային թնդանոթային համալիրներ «Պանցիր-С», С-400 «Տրիումֆ» զենիթահրթիռային համակարգը։

Ռազմական տեխնիկայի շարասյունը կփակեն «Բումերանգ» հետեւակի մարտական մեքենաները։

Շքերթի ժամանակ կցուցադրվեն նաեւ առաջին անգամ շքերթին մասնակցող հակաօդային պաշտպանության արդեն հայտնի սպառազինությունների «արկտիկական» տարբերակները՝ «Тор-М2ДТ» ԶՀՀ-ն ու «Պանցիր-СА» զենիթահրթիռային թնդանոթային համալիրը։

72 ինքնաթիռների եւ ուղղաթիռների օդային շարքը կբացի աշխարհում ամենամեծ ռազմաօդային Մի-26 ուղղաթիռը՝ չորս Մի-8-ի ուղեկցությամբ։ Դրանց կհետեւեն Մի-28Ն-ն Մի-35-ը Կա-52-ը։