Կարեն Ասլանյանը իր և 15–ամյա եղբոր նմանության և հարաբերությունների մասին

«Առաջնորդները» հեռուստասերիալի դերասան Կարեն Ասլանյանը, որը մարմնավորում է Արամիկի կերպարը, երբեմն, լուսանկարներ է հրապարակում հարազատ եղբոր հետ` ցույց տալով իրենց նմանությունը։ Tert.am Life–ի հետ զրույցում Կարենը պատմեց եղբոր հետ հարաբերությունների, նմանության և տարբերության մասին։

«Շատերն են ասում, որ Էրիկը շատ նման է ինձ։ Ինչ–որ չափով տեսնում եմ նմանություն, սակայն ոչ շատ։ Երբեք չի ձգտել նմանվել ինձ կամ ինչ–որ մեկին, քանի որ այս տարիքում արդեն ունի ձևավորված «ես»–ը։ Լինում են օրեր, երբ նույն վերնաշապիկն ենք հագնում, բայց դա չի նշանակում, որ ձգտում ենք մեկս մյուսիս նմանվել։ Դա անում ենք պահի ցանկությամբ, որը մեզ հաճույք է պատճառում։ Բնավորությամբ շատ տարբեր ենք։ Նա ավելի պատասխանատու է, կայուն ու հստակ։ Իր մեջ ինձ չեմ տեսնում։ Երկուսս էլ ունենք մեր թերություններն ու առավելությունները։ Մեր միջև չկա մրցակցություն։ Մեր ծնողները մեզ այնպես են դաստիարակել, որ ունեցածը կիսենք իրար հետ։ Երբեք մեր առաջ խնդիր չենք դնում, թե ով է ավելի լավը, որովհետև մենք մեկս մյուսիս հաջողություններով ուրախանում ենք, անհաջողություններով` տխրում։ Մեկս մյուսով ենք առաջ գնում, թև ու թիկունք ենք իրար»,–ասաց Կարենը։

Դերասանը պատմեց, որ 15–ամյա եղբոր ամենամեծ ցանկություններից մեկը ճանաչված ֆուտբոլիստ դառնալն է։ «6 տարեկանից հաճախել է ֆուտբոլի։ Հիմա շնչառական խնդիրների պատճառով բաց է թողնում պարապմունքները, սակայն, անպայման, շարունակելու է։ Շատ է սիրում ֆուտբոլը։ Դրանից բացի, հիմա տարբեր առարկաներ է պարապում` համալսարան ընդունվելու համար։ Թե ուրիշ ինչ մասնագիտություն է ուզում ընտրել, դեռ չենք խոսել»,– հավելեց Կարենը։

Դերասանը  նշեց, որ Էրիկն իր համար ավելին է, քան եղբայրը։ «Նա շատ լավ ընկեր է։ Էրիկն իր տարիքի համեմատ շատ հասուն է, լսող ու հասկացող։ Դեպքեր են եղել, երբ իրենց մեծ տղաներին խրատել է, թե որտեղ ինչպես դրսևորեն իրենց։ Նա իր մեջ ունի լիդերի հատկանիշ ու ամեն իրավիճակում շուտ կողմնորոշվում։ Ժամանակ է եղել, ինձ էլ է ասել, թե որտեղ ինչ բացթողում արեցի»,–նշեց Կարենը։

Դերասանի խոսքով` հաճախ է Էրիկի հետ ժամանակ անցկացնում։ «Հիմնականում երեկոյան ենք միասին լինում, երբ նկարահանումից հետո տուն եմ գնում։ Միասին հաճախ խաղում ենք համակարգչային խաղեր, ֆուտբոլ, դուրս ենք գալիս զբոսանքի, տարբեր թեմաներից ենք զրուցում, խրատներ եմ տալիս և այլն։ Բացի այն, որ իմ եղբայրն է, իր հետ, իսկապես, հետաքրքիր է անցնում ժամանակը»,– եզրափակեց Կարենը։