«Երեւանի հետ խաղ անել չի՛ կարելի». Երվանդ Երզնկյան

Iravunk.com-ը գրում է.

Երեւանի ավագանու ընտրությունների նախընտրական քարոզարշավը շարունակվում է մեծ թափով: Եվ եթե իշխող Հանրապետական կուսակցությունը նույն ռիթմով փորձում է երեւանցիներին ներկայացնել իր նախընտրական ծրագիրը, ապա ընտրություններին մասնակցող մյուս երկու ուժերի` «Ելք» դաշինքի եւ «Երկիր ծիրանի» կուսակցության լիդերների նյարդերն արդեն տեղի են տալիս: Մինչդեռ փոխադարձ վիրավորանքների դաշտ ՀՀԿ-ում չեն պատրաստվում տեղափոխվել: Այդուհանդերձ, «Իրավունքի» հետ զրույցում Երեւանի ավագանու ՀՀԿ-ական թեկնածու, ՀՀ ժողովրդական արտիստ, կոմպոզիտոր ԵՐՎԱՆԴ ԵՐԶՆԿՅԱՆԸ նշեց, որ ընտրարշավը դրական է ընթանում:

– Կարծում եմ` Հանրապետականի շանսերը մեծ են, եւ հավատացեք` ժողովուրդը  ոգեւորված է: Ըստ իս, այս քարոզարշավը լավ կվերջանա` հօգուտ իհարկե ՀՀԿ-ի: Համենայնդեպս, ես այդպիսի հույս ունեմ:

– Պարոն Երզնկյան, Ձեր մրցակիցները` «Ելք» դաշինքից եւ «Երկիր ծիրանի» կուսակցությունից, այս օրերին էլ ավելի շատ զբաղված են իշխանություններին քննադատելով, քան սեփական ծրագրերն ընտրողներին ներկայացնելով: Որքանո՞վ է ընդունելի ընտրապայքարի այս տարբերակը:

– Առհասարակ, ինքս` որպես պրոֆեսիոնալ, կարծում եմ, որ ամեն մարդ պետք է իր գործով զբաղվի: Պատկերացնո՞ւմ եք, եթե վաղն ինձ ասեն` դու պետք է գնաս եւ վիրաբույժ աշխատես, քեզ ամսական մի միլիոն դոլար ենք տալիս, Ձեր կարծիքով` կգնա՞մ: Իհարկե չեմ գնա, որովհետեւ դա իմ գործը չէ: Այնպես որ, Երեւանի հետ խաղ անել չի՛ կարելի: Այո՛, մեր քաղաքում թերություններ կան, եւ եթե ինչ-որ մի բան նախկինում չեն հասցրել անել, հիմա կանեն: Իսկ հիմա պատկերացրեք` եթե գան նոր մարդիկ, որոնք որեւէ կապ չունեն այդ ոլորտի հետ: Իրենց ոլորտներում, միգուցե, նրանք շատ ուժեղ են, բայց հիմա մեր ժողովուրդն իրավունք չունի գնալ փորձարկումների:

– Թե՛ ընդդիմության, թե՛ երեւանցիների հիմնական քննադատությունը վերաբերում է տրանսպորտի եւ աղբահանության խնդիրներին...

– Մենք էլ ենք խոսում այդ մասին, ես էլ եմ չէ՞ ժողովրդի մի մասնիկը:

– Իսկ առավել գլոբալ խնդիրներ Երեւանում, ըստ Ձեզ, չկա՞ն:

– Շատ գլոբալ խնդիր է տրանսպորտի եւ աղբահանության հարցը: Հարկավոր է աղբամշակման գործարան հիմնել, որը մեր ծրագրերում կա: Դա որ լինի, մեր քաղաքը կփրկվի Սովետաշենի աղբից, ու ամեն ինչ նորմալ կլինի: Կարեւոր է նաեւ տրանսպորտի հարցը, որովհետեւ մեքենաները շատացել են, իսկ երթուղայինները գիտեք, թե ինչպես են աշխատում: Այս ամենը հարկավոր է կանոնակարգել, որի վերաբերյալ  հանրապետականները լուրջ ծրագիր են ներկայացրել: Մնացածների ծրագրերը չեմ կարդացել, բայց ՀՀԿ-ի ներկայացրած ծրագիրն ինձ բավարարում է: Եվ եթե հինգ տարվա մեջ կարողանանք այդ ծրագրի գոնե 70 տոկոսն իրագործել, ապա կունենանք ավելի լավ Երեւան:

– Ձեզ համար Երեւանի ավագանու ընտրությունները քաղաքակա՞ն մրցապայքարի հարթակ է:

– Եթե համարեի, որ այն գոնե մի տոկոսով քաղաքական հարթակ է, չէի մասնակցի ընտրություններին, որովհետեւ քաղաքականությունից հեռու մարդ եմ: Ընդգրկվել եմ Հանրապետականի ցուցակում, որպեսզի ընտրվեմ ավագանի միայն նրա համար, որովհետեւ Երեւանն ինձ համար ոչ մի կապ չունի քաղաքականության հետ: Ով Երեւանը սարքի, նա էլ ինձ համար ամենալավն է:

– Ի դեպ, թեպետ մեր երկրում ընդդիմադիր հայացքներ ունեցող մշակութային գործիչների պակաս չկա, բայց ո՛չ «Ելք» դաշինքի, ո՛չ «Երկիր ծիրանի» կուսակցության նախընտրական ցուցակներում չկան անվանի մշակութային գործիչներ: Ըստ Ձեզ` ինչո՞վ է սա պայմանավորված:

– Ես էլ եմ զարմանում, թե ինչու չկան: Թող մյուս գործիչներն էլ ինչ-որ մեկի հետ լինեն, բայց լինեն ավագանու կազմում, որպեսզի կարողանան ինչ-որ մի բան անել: Երեւի, իրենց չեն առաջարկել: Դե պետք է առաջարկեն, որ մարդիկ գնան, հո իրենք չէին գնալու եւ իրենց առաջարկեին:

ՀՐԱՆՏ ՍԱՐԱՖՅԱՆ