Լեռնային Ղարաբաղում հողեր հանձնելը կնշանակի, որ մեր զոհերն անիմաստ էին. Վիրավորված զինծառայողներ

Ապրիլյան պատերազմի ընթացքում վիրավորված զինծառայողներ Հայկ Սեխլիյանն ու Դանիել Դավթյանը չեն հասկանում Լեռնային Ղարաբաղի հողերի մի մասը հանձնելու վերաբերյալ զրույցները, որոնց համար նրանք ու իրենց ընկերները, ինչպես նաեւ ժամանակին իրենց հայրերը արյուն են թափել։ Այսօր՝ մայիսի 3-ին, լրագրողների հետ հանդիպման ժամանակ Հայկ Դավթյանը, ով Մատաղիսում գլխի բեկորային վնասվածք է ստացել, նշել է, որ այս երկար տարիների ընթացքում մեր բոլոր զոհերը, ինչպես նաեւ ապրիլյան պատերազմի ժամանակ տասնյակ երիտասարդների մահը, անիմաստ կլինի։

Թալիշում ողնաշարից վիրավորված Հայկ Սեխլիյանը նշել է, որ չնայած հաշմանդամությանը, անհրաժեշտության դեպքում պատրաստ է նորից պատերազմել հօգուտ իր ժողովրդի եւ վստահ է, որ այդպես են մտածում վիրավորված բոլոր երիտասարդները։ Նա նաեւ վստահություն է հայտնել, որ ապրիլյան պատերազմի ժամանակ Ադրբեջանին անցած հողի հատվածը կրկին Արցախին կվերադարձվի։ «Այդ հողերը նրանց մոտ ժամանակավոր են գտնվում»,-ասել է նա։

Նա չգիտի, թե ինչ կլինի, եթե հողերը հանձնելու քաղաքական որոշում ընդունվի, բայց ենթադրում է, որ ոչ զինծառայողները, ոչ կամավորները դրան չեն համաձայնի։ «Այդ հողի վրա զոհվել են մեր ընկերները, եւ մենք կօգտագործենք մեր բոլոր ռեսուրսները՝ դրանք պահպանելու համար»,-ասել է նա՝ հավելելով, որ հանձնել հնարավոր է միայն Ադրբեջանի կողմից հարյուր տոկոսանոց երաշխիքների դեպքում, որ դրանք հանձնելուց հետո այն կդադարեցնի իր ռազմական գործողությունները։ «Բայց նման երաշխքի չկա, մենք գործ ունենք Ադրբեջանի հետ, իսկ նրան ոչ մի դեպքում վստահել չի կարելի», - ասել է նա։