Հնգյակ ունեցած Կարապետյանները կստանան 7.5 մլն դրամ (ֆոտո)

Մեծամորցի նորածիններից յուրաքանչյուրի համար ծննդյան կապակցությամբ կտրամադրվի 1,5 մլն դրամ: Այս մասին հայտնել է ՀՀ աշխատանքի և սոցիալական հարցերի նախարարության մամուլի քարտուղար Անուշ Դանիելյանը:

«Ընտանիքը կստանա 7.5 մլն դրամ, որից՝ 2,5 մլն դրամն ուղղակիորն կտրամադրվի ծնողներին, իսկ մնացած 5 մլնը կփոխանցվի յուրաքանչյուր երեխայի անվամբ բացված ընտանեկան դրամագլխի հաշվին, յուրաքանչյուրին՝ 1 մլն դրամ»,- նշել է նա:

Նշենք, որ ըստ օրենսդրության, երեխաների ծննդյան կապակցությամբ տրվում է միանվագ նպաստ, որը կախված է նրանից, թե որերորդ երեխան է ծնվում: Առաջին 2 երեխաների դեպքում տրվում է 50 հազարական դրամ, 3-4-րդ երեխաների դեպքում՝  1 միլիոն դրամ, իսկ 5-րդ եւ յուրաքանչյուր հաջորդ երեխայի դեպքում՝ 1.5 մլն դրամ: Այս դեպքում՝ կիրառվել է ամենաբարձր կարգաթիվը եւ բոլոր երեխաների համար կվճարվի 1,5 մլն դրամ:

Ավելի վաղ NEWS.am-ը հայտնել էր, որ այսօր՝ մայիսի 3-ին, առավոտյան ժամը մոտ 4:00-ին Երեւանի «Էրեբունի» բժշկական կենտրոնում հնգյակ է ծնվել՝ 4 աղջիկ եւ 1 տղա:

Երեխաներին անվանակոչել են Աննա, Թեհմինե, Ռոզա, Լիլիթ եւ Արա: Նրանք ծնվել են Կարապետյանների ընտանիքում, որոնք բնակվում են Մեծամորում:

Մեր տեղեկություններով՝ երեխաներին տեղավորել են մի քանի հիվանդանոցներում. երեխաներից մեկը Մոր եւ մանկան առողջության պահպանման կենտրոնում է, երկրորդը՝ «Սուրբ Աստվածամայր» հիվանդանոցում, երրորդը՝ «Մուրացան» մանկական հիվանդանոցում, մյուս երկուսը մնացել են «Էրեբունի» ԲԿ-ում:

Նրանց վիճակի մասին առայժմ միայն հայտնի է, որ ամենափոքրիկ երեխայի քաշը մոտ 600 գրամ է: Մյուսները կշռում են 700-ից մինչեւ 950 գրամ: