Ոստիկանները խախտումներ են թույլ տվել , բերման է ենթարկվել 500-ից ավելի անձ. Արման Թաթոյանը՝ հուլիսյան դեպքերի մասին

Հուլիսի 17-31-ն ընկած ժամանակահատվածում ոստիկանության բաժիններ են բերման ենթարկվել 500-ից ավելի քաղաքացի: Այս մասին այսօր՝ ապրիլի 21-ին, լրագրողների հետ հանդիպմանն ասաց Մարդու իրավունքների պաշտպան Արման Թաթոյանը՝ ներկայացնելով հուլիսյան իրադարձությունների վերաբերյալ արտահերթ հրապարակային զեկույցը:

«Այս ժամանակահտվածում ՄԻՊ աշխատակազմի արագ արձագանքման թեժ գիծ ստացվել է 200-ից ավելի հաղորդում ազատությունից զրկելու 335 դեպքի վերաբերյալ: Բողոքներից 179-ը վերաբերում է փաստաբանի մուտքը ոստիկանության բաժին խոչընդոտելու վերաբերյալ»,- ասաց օմբուդսմենը:

Ըստ Մարդու իրավունքների պաշտպանի՝ ոստիկանությունն այդ օրերին թույլ է տրվել ապօրինի բերման ենթարկելու դեպքեր, հենց սրա վերաբերյալ ՄԻՊ աշխատակազմն արձանագրել է խախտումներ. «Հուլիսի 17-ին տեղի ունեցած իրադարձությունից անմիջապես հետո քաղաքացիները նախաձեռնեցին հավաքներ: Ոստիկանությունը հենց առաջին օրվանից սկսեց խախտումներ թույլ տալ՝ քաղաքացիներին առանց որեւէ պարզաբանման եւ բացատրության բերման ենթարկելով»:

Արման Թաթոյանը կարծում է, որ ոչինչ չէր վկայում, որ այդ հավաքները կրելու են ոչ խաղաղ եղանակ, ավելին, ոստիկանները շատ հաճախ մարդկանց բերման էին ենթարկում, որ կանխեն խաղաղ հավաքները:

«Հուլիսի 18-ի հավաքը նույնպես խաղաղ նպատակ էր հետապնդում, քաղաքապետարանն էլ չէր արգելել այդ հավաքը»,- հավելեց Արման Թաթոյանը:

Հիշեցնենք, որ «Սասնա ծռեր» զինված խումբը 2016թ. հուլիսի 16-ի լույս 17-ի գիշերը գրավել էր ոստիկանության ՊՊԾ գունդը: Շուրջ երկու շաբաթ տարածքին հարակից Խորենացի փողոցում տեղի էին ունենում բողոքի ցույցեր՝ ի պաշտպանություն խմբի անդամների: Ցույցերի ընթացքում մասնավորապես երկու օր՝ հուլիսի 20-ին եւ 29-ին տեղի էին ունեցել բախումներ ոստիկանների եւ ցուցարարների միջեւ, բազմաթիվ անձինք բերման ենթարկվեցին ոստիկանության բաժանմունքներ: Նրանց մի մասին մեղադրանք է առաջադրվել զանգավածային անկարգություններ հրահրելու, ապօրինի զենք-զինամթերք կրելու, իշխանության ներկայացուցչի նկատմամբ բռնություն գործադրելու հատկանիշներով: