Այսօր Հեմոֆիլիայի համաշխարհային օրն է

Ապրիլի 17-ին Հեմոֆիլիայի համաշխարհային ֆեդերացիայի  (World Federation of Hemophilia, WFH) եւ Առողջապահության համաշխարհային կազմակերպության (ԱՀԿ) նախաձեռնությամբ աշխարհի շատ երկրներում նշվում է Հեմոֆիլիայի համաշխարհային օրը   (World Hemophilia Day): 

Հեմոֆիլիան հազվագյուտ ժառանգական հիվանդություն է, որը կապված է արյան մակարդելիության խանգարման հետ: Հեմոֆիլիայով մարդկանց անոթներում, մկաններում եւ ներքին օրգաններում ինչպես հանպատրաստի, այնպես էլ վնասվածքի եւ վիրաբուժական միջամտության հետեւանքով արյունազեղումներ են առաջանում: Նրանց մոտ մեծանում է նաեւ կենսական կարեւորություն ունեցող օրգաններում արյունազեղումների հետեւանքով մահվան ռիսկը: Սովորաբար հեմոֆիլիայով հիվանդանում են տղամարդիկ, իսկ կանայք այդ հիվանդության գենի կրողներ են լինում եւ կարող են այն փոխանցել որդիներին:  

Որոշ գնահատականների համաձայն, աշխարհում այսօր հեմոֆիլիայով հիվանդների թիվը 400 000 մարդ է կազմում (10 000 տղամարդուց մեկը): Հայաստանում 2015 թվականի տվյալներով հեմոֆիլիայով գրանցված 248 հիվանդ կա, որոնցից 65-ը երեխաներ են:

Այս օրն անցկացվող միջոցառման նպատակը հեմոֆիլիայի խնդիրների նկատմամբ հասարակության ուշադրությունը գրավելն է եւ ամեն հնարավորն անելը այդ անբուժելի գենետիկական հիվանդությամբ հիվանդներին տրամադրվող բուժօգնության որակի բարելավման նպատակով: 

Մինչեւ վերջերս հեմոֆիլիայով հիվանդ երեխաներից քչերն էին հասնում հասուն տարիքի, սակայն այսօր, մակարդելիության գործոնների առկայությանշնորհիվ, որոնք կարելի է հիվանդներին ներարկել ինչպես արյունահոսությունների, այնպես էլ կանխարգելման նպատակով, այս հիվանդությամբ մարդկանց կյանքի որակը զգալիորեն բարելավվել է, իսկ կյանքի ակնկալվող տեւողությունը մեծացել է: