Նիկոլ Փաշինյանը երևանցի չի, ի՞նչ ունի Երևանին տալու, իսկ Զարուհի Փոստանջյանն էլեկտորատ ունի. սոցիոլոգ (տեսանյութ)

Tert.am-ը գրում է .

Հայաստանում քաղաքական ուժերը հիմնականում ագրարային լուրջ ուղղվածություն ունեն, դրանց ընտրական կորիզը Երևանից դուրս է գտնվում: Այս մասին Tert.am-ի հետ զրույցում ասաց սոցիոլոգ Կարեն Սարգսյանը՝ բացատրելով , թե Երևանի ավագանու առաջիկա ընտրություններում ինչու է քաղաքական 3 ուժ մասնակցում:

««Ծառուկյան» դաշինքի հիմքը խորհրդարանական ընտրություններից հետո տեսանք, որ Արարատի ու Կոտայքի մարզն է, ՀՅԴ-ն էլ չի մասնակցում, որովհետև իր նպատակին հասավ ու իմաստ չկա Երևանի ավագանու համար պայքարել»,- նշեց սոցիոլոգը:

Երևանում առկա ընդդիմադիր զանգվածը, ըստ Կարեն Սարգսյանի, դժվար է ընտրություն կատարելու, որովհետև առաջադրված են «ԵԼՔ»-ը, որին «դժվար է ընդդիմություն համարել», և Զարուհի Փոստանջյանը:

Հարցին՝ «Ծառուկյան» դաշինքը չէ՞ր ստանա Երևանից ձայներ, Սարգսյանը պատասխանեց.  «Իսկ ի՞նչ իմաստ ունի իրենց համար Երևանի ավագանու աշխատանքային տեղերի համար պայքարելը: Ես համարում եմ լրիվ հիմնավոր իրենց բացակայությունը ավագանու ընտրություններում, փաստ չէ, որ նույնքան ձայն կհավաքեին Երևանում, որովհետև ակտիվությունը փոքր է, ռեսուրսները ծախսվում են: Իսկ ՀՀԿ-ն, պարզ է, սա իր տարածքն է, ամեն դեպքում, քանի տարի է ղեկավարում են, աշխատանքներ են տարել, քաղաքական լուրջ ներդրում է արված»:

Կարեն Սարգսյանն ասաց, որ սոցիոլոգիական տեսանկյունից Երևանի ավագանու ընտրություններում իմաստ չուներ նաև «ԵԼՔ»-ի մասնակցությունը: «Ես հասկանում եմ՝ ինչու է Նիկոլ Փաշինյանը գլխավորում դաշինքը, բայց դե մարդը երևանցի չի, ի՞նչ ունի ինքը Երևանին տալու: Չնայած, կարծում եմ, որ պրոտեստի վրա հիմնված էլեկտորատ կա, որը հավանաբար կընտրի Նիկոլ Փաշինյանին»,- ասաց սոցիոլոգը:

Կարեն Սարգսյանը նշեց, որ Զարուհի Փոստանջյանի կերպարը բավական դրական է, նա անվախ է, պայքարել է երկար տարիներ, երբեմն միայնակ է պայքարել, բայց «Երևանի ավագանին ԱԺ չի, որտեղ կարող ես խոսել, դրա դիմաց ոչինչ չառաջարկել»:

Հարցին՝ երևանցին ընտրելու է առաջին դեմքերի՞ն, թե՞ նրանց առաջարկած ծրագրերը, Կ. Սարգսյանը պատասխանեց, թե երևանցիները հեքիաթներին չեն հավատում, փորձելու են հավատալ առաջին դեմքերին:

«Կա մի զանգված, ով համարում է, որ Նիկոլ Փաշինյանն ընդդիմադիր է, կա դրա չափ էլի ընդդիմադիր զանգված, ով համարում է, որ մայլա-մայլա փաhլևանություն անելը տանիքների վրա՝ քաղաքական գործունեություն չէ: Զարուհի Փոստանջյանն ունի էլեկտորատ, նա պայքարել է, միայնակ է պայքարել, Տարոն Մարգարյանն էլ ունի ծրագիր, ծրագիրն իրականացնողներ, նրա պարագայում գիտենք, թե ումից ենք պահանջելու»,- հավելեց սոցիոլոգը:

Նիկոլ Փաշինյանը, ըստ Սարգսյանի, իրավունք չունի ներկայացնել Երևանը՝ ո՛չ կրթությամբ, ո՛չ անցած քաղաքական ուղով, իսկ գործող քաղաքապետ Տարոն Մարգարյանն ունի իրավունք ներկայացնել Երևանը, որովհետև աշխատում է:

Սոցիոլոգը նշեց, թե ՀՀԿ-ին ընդդիմադիր այլընտրանք չկա, այդ զանգվածն արտագաղթել է, մարզերից եկած մարդիկ են իրենցով արել քաղաքը: Միաժամանակ, նրա խոսքով, երթուղային տրանսպորտից, ձյունամաքրման աշխատանքներից դժգոհող երևանցին իր ձայնը չի տա Տարոն Մարգարյանին, բայց Նիկոլ Փաշինյանին էլ չի տա: «Նիկոլ Փաշինյանը կարող է ձյունը մաքրել կամ հանրային տրանսպորտը կարգի բերե՞լ, իհարկե՝ ոչ»,- ասաց նա:

Մանրամասները՝ տեսանյութում։