Կոմայգու գիշերային կյանքի մի դրվագ. «սովորական» դանակահարություն, «աղջկա շորերով տղա», ծեծից մահացած պահակ…

Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ ընթանում է Արթուր Ա.-ի գործի դատական քննությունը:

23-ամյա Արթուրը մեղադրվում է տուժող Տիգրան Պ.-ի որովայնի շրջանին կտրող-ծակող գործիքով հարվածելու, նրա առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Դեպքը կատարվել է Կոմայգում, գիշերվա ժամը 4-5-ի սահմաններում:

Արթուր Ա.-ն իրեն մեղավոր չի ճանաչում, նա պնդում է, որ տուժողին ինքը չի դանակահարել, ծանր վնաս չի պատճառել:

Դատարանում տուժողը «չի ճանաչել» ամբաստանյալ Արթուրին՝ որպես իրեն ծանր մարմնական վնասվածք պատճառողի: Նկարագրել է, որ իրեն հարվածողը ավելի կարճահասակ է եղել՝ իր հիշելով:

Նախաքննական ցուցմունքում տուժողն ասել է, թե իրեն առաջին օգնությունը Կոմայգում ցույց է տվել մի աղջիկ: Բայց ավելի ուշ ինքն իմացել է, որ դա աղջկա շորերով տղա է եղել…

Կոնկրետ Արթուրի անունը հայտնել, նրա դեմ ցուցմունքներ են տվել դեպքի վայրում եղած վկաներ, ովքեր առերես հարցաքննությամբ պնդել են իրենց ցուցմունքները: Նրանք ծանոթ են եղել Արթուրին, հայտնել են, թե վիճաբանություն է եղել Կոմայգում: Արթուր Ա.-ն եղել է ագրեսիվ, նա հարվածել է տուժողի որովայնին…

Վկաների մի մասը, այդ թվում՝ առանցքային վկա Տիգրան Ք.-ն,  Կոմայգու գիշերային այն «աշխատողներից է», ովքեր «աշխատավայր» են ներկայանում զգեստափոխված…

Որոշ վկաներ, այդ թվում՝ Տիգրան Ք.-ն, այդպես էլ դատարան չներկայացան, նրանց բերման ենթարկելու որոշումները չկատարվեցին, դատարանում հրապարակվեցին նրանց նախաքննական ցուցմունքները:

Այս դատական նիստին հրապարակվեց տուժողի բարեկամի ցուցմունքը: Այս վկային բերման ենթարկելու որոշումը նույնպես չէր կատարվել, ոստիկանները վկային չէին գտել…

Նախաքննական ցուցմունքում վկան հայտնել էր, որ տուժող Տիգրանն իր բարեկամն է, նա դեպքից ոչ շատ առաջ Ռուսաստանից եկել էր Հայաստան: Բարեկամը նրա հետ սերտ շփումներ չի ունեցել:

Դեպքի օրվա վաղ առավոտյան Տիգրանը զանգել է վկային ու խնդրել է, որ նա գնա «Մուրացանի հոսպիտալի մոտ»: Վկան այդ հոսպիտալից մոտ երկու հարյուր մետրի վրա է բնակվում: Նա անմիջապես գնացել ու հանդիպման վայրում տեսել է Տիգրանին, ում որովայնի մասն արյունոտ էր: Տիգրանը բարեկամին ասել է, թե «Ոսկու շուկայի մոտ» ինչ-որ մեկը մոտեցել, իրենից ծխախոտ է խնդրել, ինքը չի տվել, իրենց միջև վիճաբանություն է առաջացել, ու անծանոթ երիտասարդը դանակով հարվածել է իրեն:

Տուժողի բարեկամն անմիջապես տաքսի ծառայություն է զանգել, տաքսիով Տիգրանին տարել է հիվանդանոց:

Քննիչի հարցին՝ վկան ծանո՞թ է Տիգրանի ընկերներին, շրջապատին, գիշերով Տիգրանը ի՞նչ գործ կարող էր ունենալ Կոմայգու մոտ, վկան պատասխանել է, որ տեղեկություններ չունի, Տիգրանի շրջապատով չի հետաքրքրվել, դանակահարող երիտասարդին չի ճանաչել:

Վկան ասել է, թե Տիգրանը ինչպես դեպքից առաջ, այնպես էլ դեպքից հետո չի աշխատել:

Այս վկայի ցուցմունքի հրապարակումով ավարտվեց գործի դատաքննությունը:

Մեղադրողը մի քանի րոպե ժամանակ խնդրեց՝ մեղադրական ճառին նախապատրաստվելու համար:

Հիշեցնենք, որ Կոմայգում կատարած հանցավոր արարքների համար Արթուր Ա.-ն մեկ անգամ արդեն դատապարտվել էր Կենտրոն և Նորք-Մարաշ վարչական շրջանների ընդհանուր իրավասության դատարանի՝ 2014 թվականի փետրվարի 20-ի դատավճռով:

Ըստ այդ դատական ակտի՝2013 թվականի ապրիլի 9-ին, դարձյալ գիշերվա ժամը 4-ին Արթուր Ա.-ն Կոմայգու մոտ աղմկել է, հայհոյանքներ է տվել, վիճաբանել է դիտողություն անող պահակի հետ, բռունցքով մեկ հարված է հասցրել նրա ծնոտին, պահակը վայր է ընկել ու գլխի շրջանում ստացել ծանր մարմնական վնասվածք: Նույն դեպքի շրջանակներում Արթուրը նաև ծեծի է ենթարկել մեկ այլ քաղաքացու:

Գործի քննության ընթացքում մահացել է Կոմայգու պահակը, ով ծանր վնասվածք էր ստացել գլխի շրջանում:

Արթուր Ա.-ն դատապարտվել է 150 հազար դրամ տուգանքի: Հաշվի է առնվել, որ Արթուրը գործի քննության ընթացքում՝ 2013 թվականի ապրիլի 18-ից մինչև 2013 թվականի հոկտեմբերի 26-ը՝ 6 ամիս 8 օր գտնվել է կալանքի տակ: Օրենքի համապատասխան հոդվածի կիրառմամբ՝ դատարանը Արթուր Ա.-ին ազատել է տուգանքի ձևով նշանակված պատժից:

Կոմայգում կատարած հանցավոր արարքների համար դատապարտումից, պատժից ազատումից հետո Արթուրը, մինչև Կոմայգու երկրորդ գործով մեղադրվելը, մի անգամ էլ դատվել է Էրեբունի և Նուբարաշեն վարչական շրջանների ընդհանուր իրավասության դատարանի կողմից:

Խմբի կազմում կատարած գողության փորձի համար Արթուր Ա.-ն 2015 թվականի մարտի 18-ի դատավճռով դատապարտվել է 4 տարի ազատազրկման: Այս գործով կայացված դատավճիռը ներկայումս բողոքարկվում է վերաքննիչ քրեական դատարանում:

Խմբակային այս գործի քննության ընթացքում բացահայտվել է Կոմայգում կատարված  հանցագործությունը, տուժողի առողջությանը ծանր վնաս հասցնելու համար մեղադրվել է Արթուր Ա.-ն, 2014 թվականի սեպտեմբերի 19-ից նա առնվել է արգելանքի տակ:

Միանգամից երկու գործով դատվող Արթուրի ձախ երիկամը հեռացված է, նա նյարդերի հետ կապված խնդիրներ ունի:

Մեղադրողն իր ճառում ապացուցված գնահատեց Արթուր Ա.-ի մեղքը՝ տուժող Տիգրանի որովայնի շրջանում դանակի հարված հասցնելու, նրա առողջությանը ծանր վնաս պատճառելու համար՝ ՀՀ քրեական օրենսգրքի 112 հոդվածի 1-ին մասով:

Արթուրի պատասխանատվությունն ու պատիժը ծանրացնող կամ մեղմացնող հանգամանքներ մեղադրողը չնշեց: Նա միջնորդեց Արթուրին մեղավոր ճանաչել ու դատապարտել 5 տարի ազատազրկման:

Ամբաստանյալի շահերի պաշտպան Ա. Եսայանը ժամանակ խնդրեց՝ պաշտպանական ճառին նախապատրաստվելու համար:

Աղբյուրը՝ BlogNews.am