Ընթացիկ ամսվա վերջում պտուղբանջարեղենի արտահանումների ծավալը կգերազանցի 2014թ տարեկան ծավալը. գյուղփոխնախարար

Tert.am-ը գրում է.

Հուլիսի 9-ի դրությամբ հանրապետությունից արտահանված պտուղբանջարեղենի և կարտոֆիլի քանակը կազմում է 41 հազ. 700 տոննա, ինչը 15 հազ. 300 տոննայով գերազանցում է նախորդ տարվա նույն ժամանակաշրջանի ցուցանիշը: Նշենք, որ նախորդ տարի ցուցանիշը կազմել է 26 հազ. 400 տոննա: Այս մասին Tert.am-ի հետ զրույցում ասաց գյուղատնտեսության փոխնախարար Գառնիկ Պետրոսյանը:

«Մեր կանխատեսումներով՝ ընթացիկ ամսվա վերջին արտահանումների ծավալը կգերազանցի 2014թ-ի տարեկան ծավալը, ինչը եղել է 46 հազ. 500 տոննա: Ընթացիկ տարվա արտահանումների 81%-ը բաժին է ընկնում ՌԴ-ին, 18%-ը՝ Վրաստանին, իսկ մնացած 1%-ը՝ այլ երկրներին՝ Բելառուս, Ղազախստան, Լեհաստան, Արաբական Միացյալ Էմիրություն և այլն»,-ասաց նա:

Գյուղփոխնախարարը նշեց, որ արտահանվող պտուղների մեջ իր քանակությամբ առանձնանում է ծիրանը: Արտահանված ծիրանի քանակը վերջին՝ հուլիսի 9-ի տվյալներով կազմել է 15 հազ. 800 տոննա, ի տարբերություն նախորդ տարվա 863 տոննայի: Արտահանված ծավալով երկրորդ տեղում է կեռասը՝ 1455 տոննա, որը ևս գերազանցում է նախորդ տարվա ցուցանիշին՝ 353 տոննա:

«Արտահանումների գործում այսօր կա մեծ մրցակցություն, մենաշնորհային դիրք որևէ մեկը չունի: Կան տնտեսվարող սուբյեկտներ, որոնք նախկինում ևս զբաղվել են արտահանումներով, կան նաև վերջին ամիսներին շուկա մուտք գործած ընկերություններ: Ուրախացնող է, որ շատ գյուղացիական տնտեսություններ արդեն իրենք են իրենց սեփական գյուղմթերքը արտահանում: Սա շատ կարևոր հանգամանք է: Կան նաև Վրաստանից եկողներ, որոնք գալիս ու արտանում են կատարում»,-ասաց նա:

Ինչ վերաբերում է գներին, ապա Գառնիկ Պետրոսյանը նշեց, որ դրանք տարբեր են եղել՝ կախված արտահանման ժամանակահատվածից: Մթերքի աճման ավելի վաղ շրջանում, գները ավելի բարձր են եղել:

«Նաև ինքաթիռով էին արտահանվում,  իսկ հիմա ավտոմոբիլային տրանսպորտով է  արտահանվում: Ծիրանի դեպքում գները սկսվել են 2700 դրամից և հասել մինչև 300 դրամի: Ծիրանի հիմնական քանակությունը արտահանվել է 300-400 դրամով: Կեռասի արտահանումները միջին հաշվով կատարվել են 600-800 դրամով»,-ասաց նա:

Գյուղփոխնախարարը նաև հավաստիացրեց, որ այս տարի չկան խնդիրներ նաև մթերումների հետ կապված:

«Մենք անհանգստություն ունեինք և՛ արտահանումների, և՛ մթերումների հետ կապված: Դեռևս տարվա սկզբից նախարարի մոտ պարբերաբար քննարկումներ են կատարվել վերամշակող ընկերությունների ներկայացուցիչների ու արտահանողների հետ, հարցեր են բարձրացվել, օպերատիվ լուծումներ տրվել: Այս պահի դրությամբ մենք որևէ լուրջ խնդիր չունենք, ու ամեն ինչ գնում է ցանկալի փուլով»,-ասաց նա:

Փոխնախարարը նաև կանխատեսեց, որ այս տարի բերքառատ են լինելու նաև խաղողի այգիները։