Չեմ հանդիպել մի զինվորի, ով ծառայելուց հետո ափսոսանք է ապրել. Մովսես Հակոբյան

Tert.am-ը գրում է.

Զինված ուժերում շարունակվում է ամառային զորակոչը. այսօր Զինված ուժերի հանրապետական կենտրոնական հավաքակայանում էին հավաքվել շուրջ 300 նորակոչիկներ: Տղաները ոգևորված էին և ուրախ, կատակում էին միմյանց հետ, քննարկում թե որտեղ են ուզում ծառայել:

Արդեն երկրորդ տարին է՝ նորակոչիկները վիճակահանության միջոցով են ընտրում ծառայության վայրը, ինչը կատարվեց նաև այսօր: Վիճակահանությանը ներկա էին նաև ծնողները: Նրանք բարի ծառայություն էին մաղթում բոլոր տղաներին:

Նորակոչիկների հետ զրուցեց նաև Հանրապետության զինված ուժերի գլխավոր շտաբի պետի տեղակալ գեներալ-լեյտենանտ Մովսես Հակոբյանը, բացատրեց թե ինչ կարևոր է բանակում կարգապահությունը և հետաքրքրվեց, թե ով որտեղ է ուզում ծառայել: Շատերը ցանկություն հայտնեցին ծառայել Արցախում կամ սահմանային հատվածներում:

Լրագրողների հետ զրույցում Մովսես Հակոբյանն ասաց, որ ուրախ է՝ տեսնելով, որ տղաները ոգևորված են, ինչը, ըստ նրա, ավելանալու է զորամաս հասնելուն պես և երդման ժամանակ:

«Ես չեմ հանդիպել այնպիսի զինվորի, որ հայկական բանակը ծառայելուց հետո ափսոսանք է ապրել: Այսօր նորակոչիկները պետք է փոխարինեն ծառայությունն արդեն ավարտած և պահեստազորի անձնակազմին համալրած տղաներին, որպեսզի բանակի մարտունակությունը ապահովվի:Վիճակահանությունից հետո և բուժզննում անցնելուց հետո ներկայանում են իրենց զորամասեր: Համապատասխան ծրագիրը յուրացնելուց հետո նշանակվում են պաշտոնների: Այն զինծառայողները, որոնք ընդգրկվելու են մարտական հերթապահության, նրանք նորից անցնում են կիսամյա վերապատրասման դասընթացներ, որից հետո նոր միայն ընդգրկվում են մարտական հերթապահության»,-ասաց նա:

Հարցին, թե ինչ հետևողականություն կա նորակոչիկների առողջության նկատմամբ, քանի որ դեպքեր են գրանցվում, որ ծառայության առաջին ամիսներին պարզվում է, որ զինվորը առողջական խնդիրներ ունի, Մովսես Հակոբյանը պատասխանեց. «Բուժզննում իրականացնում ենք մի քանի փուլով: 14 տարեկանից վերցնում ենք հաշվառման ու իրականացնում բուժզննում, որտեղ որոշվում է նրանց առողջական վիճակը: Նրանց մի մասը ուղղվում է հիվանդանոցներ՝ բուժում անցնելու և հետագայում զորակոչվելու համար: Այնուհետև զորակոչի նախաշեմին կրկին կենտրոնական բժշկական հանձնաժողովի կողմից անցնում են բուժզննում»:

Մովսես Հակոբյանը նշեց, որ ամառային զորակոչի 11 օրվա ընթացքում 4 հոգի չի ուղարկվել զորքեր՝ լրացուցիչ բուժզննում անցնելու համար:

Ինչ վերաբերում է բանակում գրանցվող սպանություններին կամ ինքնասպանություններին, ապա գեներալ-լեյտենանտը նշեց, որ ընդհանուր առմամբ քրեածին երևույթները վերահսկելի են բանակում ու մտահոգության տեղիք չկա:

«Եթե համեմատության մեջ նայենք, ապա պետք է նշել, որ տարեցտարի լուրջ նվազում ունենք քրեածին հանցագործությունների, և բանակը այս ուղղությամբ աշխատանքը շարունակում ու շարունակելու է, թեև իսպառ բացառել հնարավոր չէ»,-ասաց նա:

Մովսես Հակոբյանը գնահատեց նաև սահմանային իրադրությունը և ընդգծեց, որ այս պահին իրավիճակը հանգիստ է ու հանդարտ, որևէ ակտիվ գործողություններ չկան:

«Եթե համեմատենք տարվա սկզբի հետ, անհամեմատ խաղաղ է: Եթե համեմատեք անցած տարվա նույն ժամակահատվածի հետ, կրկին հանգիստ է և լուրջ միջադեպեր առաջին գծում չկա»,-ասաց նա:

Նշենք, որ ամառային զորակոչը կշարունակվի մինչև հուլիսի 30-ը: