Աշխարհը մեր դեմ չէ, եթե դեմ լիներ, Արցախը վաղուց կորցրած կլինեինք. Արա Պապյան (տեսանյութ)

«Մոդուս վիվենդի» կենտրոնի ղեկավար Արա Պապյանը Tert.am-ի հետ զրույցում ասաց, որ գերտերություններին շահեկան չէ լարվածությունը մեր տարածաշրջանում, դրա համար էլ այս պահին մեծ պատերազմներ չկան։ «Ոմանք ասում էին, որ աշխարհը մեր դեմ է, մեզ ճնշում են, բայց եթե աշխարհը մեր դեմ լիներ, ապա մենք վաղուց չէինք կարող Արցախը պահել»,-ասաց նա։ 

-Պարո՛ն Պապյան, ՌԴ արտգործնախարար Սերգեյ Լավրովն իր հարցազրույցներից մեկում ասել է, թե Բաքուն և Երևանը զգալիորեն մոտեցրել են Լեռնային Ղարաբաղի հակամարտության կարգավորման հարցում դիրքորոշումները, կարգավորման հիմնարար սկզբունքները։ Որտե՞ղ են մեր մոտեցումները մոտեցել՝ հաշվի առնելով Ադրբեջանի մաքսիմալիստական հայտարարությունները։

–Ես, իհարկե, տեղյակ չեմ բանակցային գործընթացների մանրամասներից, բայց դատելով ընդհանուր տրամաբանությունից՝ դա այն սկզբունքն է, որը տարիներ ի վեր հնչում է՝ տարածքներ կարգավիճակի դիմաց։ Եթե Ալիևը շարունակում է պնդել, որ իր հավակնությունները ոչ միայն այսպես կոչված «գրավյալ» կամ ազատագրված տարածքներն են, այլ բուն Արցախը և դեռ մի բան էլ ավելի՝ Երևանը, Հայաստանը, հետևաբար որևէ մոտեցում չի կարող լինել։ Ժամանակին մենք որպես բանակցային հիմք ընդունում էինք այդ սկզբունքը, որ մենք ինչ-որ բան զիջում ենք, և Ադրբեջանը դրա դիմաց ճանաչում է Արցախի ինքնորոշման իրավունքը, ապա հիմա Ալիևը հայտարարում է իր անհամաձայնության մասին՝ ասելով, որ դա ներադրբեջանական գործընթաց է։ Կարծում եմ՝ Լավրովը ավելի շատ առաջնորդվում իր սեփական ցանկությամբ և ավելի հուսադրող հայտարարություններ է անում, քան իրականությունը, որը մենք ունենք։ 

-Ապրիլյան պատերազմից հետո բանակցային գործընթացում ինչ-որ առաջընթաց, փոփոխություն տեսնո՞ւմ եք։