Գլենդելի քաղաքապետական խորհրդի երեք թափուր տեղերը կզբաղեցնեն հայերը

Գլենդելում ապրիլի 4-ին կայացած քաղաքի խորհրդի ընտրություններում, նախնական արդյունքների համաձայն, հաղթանակ են տարել հայեր Վրեժ Աղաջանյանը, Արա Ջեյմս Նաջարյանը եւ Զարեհ Սինանյանը, հաղորդում է Los Angeles Times-ը: 

Ըստ այդմ, Վրեժ Աղաջանյանն ստացել է 6 288 ձայն, Արա Նաջարյանը՝ 6 132 ձայն եւ Զարեհ Սինանյանը՝ 5 998 ձայն: Վերջնական արդյունքները կհրապարակվեն ապրիլի 21-ին, քաղաքի կայքում:

Նշենք, որ Գլենդելի քաղաքային խորհրդի 3 թափուր աթոռների համար պայքարում են 10 թեկնածուներ, որոնցից 4-ը հայեր են՝ Արա Ջեյմս Նաջարյանը, Վրեժ Աղաջանյանը, Օնիկ Մեհրաբյանն ու Զարեհ Սինանյանը: Վերջինս քաղաքապետական խորհրդի գործող անդամ էր:

Վրեժ Աղաջանյանը մասնագիտության ճարտարագետ է, նա հայտնի է հայկական կաբելային հեռուստաալիքով քաղաքական թոք-շոուներ վարելով:  Աղաջանյանը նշել է, որ իր ընտրվելու դեպքում՝ կնպաստի Գլենդելի քաղաքային խորհրդի թափանցիկ աշխատանքին, նաեւ կաջակցի փոքր բիզնեսին:

Գլենդելի նախկին քաղաքապետ Արա Նաջարյանն իր հերթին նշել է, որ ջանքեր կգործադրի քաղաքի հասարակական տրանսպորտի ցանց ընդլայնելու ուղղությամբ:

Նշենք, որ սա Զարեհ Սինանյանի  համար Գլենդելի քաղաքային խորհրդում երկրորդ ժամկետն է լինելու: Նա խոստանում է Գլենդելում բնակարանների ձեռքբերման ավելի մատչելի տարբերակներ մշակել: Սինանյանը գիշերն ընկերների հետ նշել է իր նախնական հաղթանակը: