Հայաստանը մասնակցել է Հելսինկիի եզրափակիչ ակտի 40-ամյակին նվիրված ԵԱՀԿ բարձր մակարդակի հանդիպմանը
Միջազգային
Հուլիսի 10-ին Ֆինլանդիայի մայրաքաղաք Հելսինկիում տեղի է ունեցել ԵԱՀԿ բարձր մակարդակի ոչ պաշտոնական հանդիպում, որը նվիվրված էր Հելսինկիի եզրափակիչ ակտի ստորագրման 40-ամյա տարեդարձին: Միջոցառմանը Հայաստանի պատվիրակությունը գլխավորում էր ԱԳ նախարարի տեղակալ Աշոտ Հովակիմյանը:
Իր ելույթում նախարարի տեղակալը կարևորել է կոնսենսուսի սկզբունքի վրա հիմնված ԵԱՀԿ դերակատարությունը հակամարտությունների խաղաղ կարգավորման գործում:
Անդրադառնալով Հելսինկիի եզրափակիչ ակտի սկզբունքներին՝ Աշոտ Հովակիմյանը նշել է, որ դրանք հավասար են, և դրանց միջև որևէ հակասություն չկա: Նա մտահոգություն հայտնեց ԵԱՀԿ որոշ մասնակից պետությունների փորձերի առնչությամբ՝ մոռացության մատնել ազգերի հավասար իրավունքների և ինքնորոշման սկզբունքը: Ընդգծվել է, որ միակողմանի պատժամիջոցների կիրառումը, այդ թվում՝ ցամաքային շրջափակումը, բացասաբար է ներգործում հակամարտությունների խաղաղ կարգավորման վրա:
Հայկական կողմը անհրաժեշտ է համարել հակամարտությունների գոտիների բնակչության և նրանց ընտրյալ ներկայացուցիչների ներգրավումը հակամարտությունների կարգավորման բանակցային գործընթացում, ինչը կարժևորի ԵԱՀԿ դերակատարությունը հակամարտությունների հանգուցալուծման և մարդու իրավունքների պաշտպանության բնագավառներում:
Իր ելույթում նախարարի տեղակալ Հովակիմյանը կարևորել է ԵԱՀԿ և դրա համաձայնեցված միջնորդական ձևաչափերի գործունեության ակտիվացումը վստահության ամրապնդման, հանրությունների միջև շփումների և հաշտեցման գործընթացներում: Նա վերահաստատել է Հայաստանի աջակցությունը ԵԱՀԿ Մինսկի խմբի համանախագահների կառուցողական միջնորդությանը և տարածաշրջանում խաղաղությանը:
Միջոցառման շրջանակներում Աշոտ Հովակիմյանը նաև երկկողմ հանդիպումներ է ունեցել ԵԱՀԿ ԺՀՄԻԳ տնօրեն Միքայել Գեորգ Լինկի, Իտալիայի ԱԳ նախարարի տեղակալ Բենեդետո Դելլա Վեդովայի և ԵԱՀԿ գերմանական նախագահության հատուկ ներկայացուցիչ Գերնոտ Էրլերի հետ:
1
2
3
4
5
1
2
3
5
3
5
