ԼՂ հակամարտության կարգավորման հիմնարար սկզբունքները հիմնականում համաձայնեցված են. Լավրով

Միջնորդների աջակցության շնորհիվ Բաքուն և Երևանը զգալիորեն մոտեցրել են Լեռնային Ղարաբաղի հակամարտության կարգավորման հարցում դիրքորոշումները, կարգավորման հիմնարար սկզբունքները հիմնականում համաձայնեցված են: Այդ մասին հայտարարել է ՌԴ արտգործնախարար Սերգեյ Լավրովը «Բաքվի աշխատավոր» թերթում հրապարակված հոդվածում, որը նվիրված է Ռուսաստանի և Ադրբեջանի միջև դիվանագիտական հարաբերությունների հաստատման 25-ամյակին:

«Անկեղծորեն շահագրգռված ենք, որ տարածաշրջան վերադառնա խաղաղությունն ու անդորրը, որպեսզի այնտեղ այլևս մարդիկ չզոհվեն, բացվեն սահմանները, վերսկսվեն տնտեսական փոխանակումները: Դրա համար անում ենք հնարավոր ամեն բան: Իրականացնում ենք մեր միջնորդական առաքելությունը՝ ինչպես ինքնուրույն, այնպես էլ այլ երկրների՝ ԵԱՀԿ Մինսկի խմբի համանախագահներ ԱՄՆ-ի և Ֆրանսիայի հետ միասին: Միջնորդների աջակցության շնորհիվ կողմերին հաջողվել է զգալիորեն մոտեցնել շատ վիճելի պահերի շուրջ դիրքորոշումները: Հիմնականում համաձայնեցված են կարգավորման հիմնարար սկզբունքները»,- ասել է Լավրովը:

ՌԴ արտգործնախարարը, սակայն, նշել է, որ Ադրբեջանը և Հայաստանը տարբեր կերպ են տեսնում դրանք կյանքի կոչելու հաջորդականությունը: «Այդ առնչությամբ մեր խնդիրն այն է, որ օգնենք կողմերին գտնել առկա մշակումների հիման վրա հավասարակշռված որոշում»,- ասել է Լավրովը:

ՌԴ արտգործնախարարը հույս է հայտնել, որ Բաքուն և Երևանը կկարողանան փոխադարձ զիջումների քաղաքական կամք, պատրաստակամություն դրսևորել:

«Հույս ունենք, որ Բաքուն և Երևանը կկարողանան փոխադարձ զիջումների քաղաքական կամք, պատրաստակամություն դրսևորել: Դա անհրաժեշտ է, որպեսզի բանակցային գործընթացը լինի արդյունավետ: Իհարկե, առաջխաղացման կարևոր պայման են մնում հակամարտության գոտում լարվածության ընդհանուր նվազեցումը և դրա լուծման ուժային մեթոդների փորձերից հրաժարումը: Ռուսաստանն, իր հերթին, պատրաստ է աջակցել խնդրի լուծման տարբերակին, որն ընդունելի կլինի ներգրավված բոլոր կողմերի համար, իսկ պայմանավորվածության ձեռքբերման դեպքում՝ մյուս միջնորդների հետ միասին հանդես գալ կարգավորման երաշխավոր»,- ասել է Սերգեյ Լավրովը: