Թուրքիայում հեղաշրջման փորձի գիշերն «Աքընջը» ավիաբազայից մի քանի անգամ զանգահարել են ԱՄՆ

Թուրքիայում 2016թ.-ի հուլիսի 15-ի ռազմական հեղաշրջման փորձի գործով հարցաքննություններից մեկի ընթացքում պարզվել է, որ հեղաշրջման փորձի գիշերը թուրքական «Աքընջը» ռազմական ավիաբազայում գտնվող գեներալ-մայոր Իդրիս Աքսոյը բավականին հաճախ զանգահարել է ԱՄՆ, այս մասին հայտնում է թուրքական diken.com.tr կայքը:

Մասնավորապես, գիշերը ժամը 01.29-ին գեներալ-մայորը 9 անգամ զանգահարել է ամերիկյան մի հեռախոսահամարով, խոսակցությունները բավականին կարճ են տևել և, ընդհանուր առմամբ, կազմել 543 վայրկյան: Հայտնի է, որ հեղաշրջման մասնակից Աքսոյը մեկ անգամ էլ զանգահարել Մեծ Բրիտանիա:

Նա ԱՄՆ է զանգահարել նաև հուլիսի 16-ին, 17-ին և 18-ին:

Պաշտպանական ճառի ընթացքում Աքսոյը հերքել է հեղաշրջման կազմակերպման համար մեղադրվող թուրք կրոնական գործիչ Ֆեթուլլահ Գյուլենի հետ որևէ կապ ունենալու մեղադրանքներն ու հայտնել, որ թեև գործի բերումով մի քանի անգամ գտնվել է ԱՄՆ-ում, սակայն Գյուլենին այնտեղ չի հանդիպել:

Նա նաև հավելել է, որ իր հետ դատարանի առաջ կանգնած հեղաշրջման փորձի մասնակիցներից որևէ մեկն, իր իմանալով, գյուլենական չէ:

Հիշեցնենք, որ 2016 թվականի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում: